Pyrshang tem ki nongialam na jrong, ioh pur ka jingiakhih sha ka sorkar

Shillong: Ka jingiakhih ki MDC ha KHADC ka lah ban pur shaduh ka sorkar jylla bad ban tem ia kane, ki nongialam ba heh ki party ba don ha ka sorkar kynthup ka NPP bad PDF kila pyrshang ban tem ia ki MDC ban long kiba jai jai.
Katkum ka jingtip, hynnin ka miet, ka kynhun ki MDC kiba don ha ka People Democratic Alliance (PDA) ki la iakynduh ia u symbud myntri rangbah u bah Prestone Tynsong halor ka jingiakhih pyrshah ia u CEM u bah Teinwel Dkhar ha KHADC.
Hynrei kila shah pynthanda ha ki nongialam bad lashai ka sngi ka 3 tarik Jymmang, kan don ka jingialang jong ka United Democratic Alliance (UDA) ban wan iashim bynta baroh ki MDC kiba don ha ka kynhun UDA kynthup ki 8 ngut kiba leh phoi.
Ka jingialang ka long por 7 baje janmiet bad kan long ka jingialang ban iakdup biang ne yn iapra syndon hadien ba la mih ka jingiakynnoh bad ka jingiakdew kti.
“Lashai kan dei ka jingialang baroh ar liang, kiba weng ia ka jingkyrshan na ka UDA bad kiba dang kyrshan”, la ong uwei u MDC ba pyrshah ia u bah Teinwel.
Une u MDC bym kwah pynpaw ialade, ula ong ba lashai ka jingialang kan long kaba kut ban iather ia ki jingshisha baroh.
“Ngin sa ia peit hadien ka jingialang lashai”, ula ong bad ki la bat ba ka jingweng na ka UDA ka dang neh haduh mynta haduh ban ia rai lashai ka sngi.