Pyrshah U Mukul ba pynsangeh, U Modi ia ki skhim ka NEIIPP

Shillong, 4 Nohprah:
Shi sngi hadien ba ka sorkar u Narendra Modi ka la pynsangeh ia ki skhim thymmai na ka bynta ka skhim North East
Industrial and Investment Promotion Policy (NEIIPP), 2007, u Myntri rangbah ka jylla u Mukul Sangma ha kane ka sngi Palei u la ong ba ki sorkar jylla kane ka thain lammihngi ka India kin leit lang shrup ban
pynsngew ia ka jingpyr shah ia kane. “Ngin leit lang ban iakren ia kane ka kam bad ka sorkar India”, la ong u Sangma mynta ka sngi, haba kyntait ban pynpaw shuh shuh halor kane.
Katkum ka jingong u Sangma, u la dep iakren bad ki myntri rangbah jong
kane ka thain shatei lammihgngi ka India.
Ia kane ka jingleh ka sorkar pdeng ban pynduh ia baroh ki skhim
thymmai ia kane ka skhim la pyrshah da ki MP na Meghalaya bad na Assam
ruh.
Lah ban kdew ba ka hukum na ka sorkar pdeng halor kane la pynmih ha
kane ka sngi Nyngkong da ka tnad Industrial Policy and Promotion na ka
tnad Commerce and Industry sha baroh ki jylla jong ka thain kynthup
ia ka Assam, Arunachal Pradesh, Manipur, Meghalaya, Mizoram, Nagaland,
Sikkim bad ka Tripura.
Ki katto katne ki bynta ba kongsan jong kane ka skhim NEIIPP 2007 ki
kynthup ia ka jingpynlait siew khajna kaba 100 per cent bad ka
jingpynlait khajna na ki mar ba la pynmih na ki karkhana na kane ka
thain nalor ka jingai jingiarap bad ka jingairam kaba rit.