Pyrshah U Ma Vincent ba set phatok ia U Sordar & U CEM r“Ka Contempt of Court Act, kam don bor ban set phatok ia ki nongsynshar”

Shillong, 18 Jymmang:
Halor ka hukum jong ka High Court jong ka Meghalaya, kaba la rai ban set phatok ia U Sordar jong ka Wahkhen bad kumjuh ia U Chief Executive Member jong ka Khasi District Council, na ka daw jong ka jingialeh pyrshah jongu, halor ka rai jong ka kashari, kaba ha ka 10tarik Nohprah 2014 bad ha kaba ka kashari, ka ka rai ban nym ithuh shuh ia ka borjong ki Rangbah Shnong, ha kaba ai ia ki syrnot pyn ithuh, ha ka jingiadei bad ka sngi kha, sngi iap, ka jingdon jaka puta bad kiwei kiwei bad halor katei ka phang, U Ma Vincent Pala MP jong ka Shillong parliamentary Constituency, ula iakren bad ka Sonia Gandhi, na ka bynta ba kan peit ba ka seng Congress, kaba ieng ban iada ia ki riewlum, ba kan ieng ban iarap lem, ha kaba kum kane ka khep jong ka jingeh kaba ki ia kynduh.
Halor kane ka phang, U MP, ula phah ruh ia ka jingthoh jongu sha ka tnat kam ain jong ka sorkar India, sha ka Law Commission jong ka sorkar India bad sha U Chairman jong ka Parliamentary Standing Committee kaba dei halor ka kam ain, na ka bynta ban pyn kylla noh ia kitei ki ain bad ha kajuh ka phang kaba iadei bad ka jingleh pyrshah kashari, khnang ba kitei ki ain, kin nym shah thombor bad shah pynthut ha ka bor jong ka kashari, namar ba ki dei ki ain kiba peit ia ka dustur ka riti jong uba rim ba jah.
U Ma Pala, ula ong shuh shuh ba ha ki ain jong ka Sixth Schedule bad ka jingialeh pyrshah kashari lane ka Contempt of Courts Act jong ka riti synshar Ri, kam don nongrim satia ban set phatok ia ki nongsynshar bad la ong ba dei tang U Lat lane ka sorkar kaba jied da u paidbah bad ki ain jong ki District Council, kiba hap ha ka Sixth Schedule, kiba lah ban pyntreikam ia kitei ki ain kiba iadei bad ka dustur uba rim ba jah.
U Ma Pala, ula ong ba un ia pyni bor bad ki bor sorkar jong ka sorkar India, na ka bynta ban pynneh ia ki ain bad ki dustur riti jong uba rim ba jah bad kiba la don ha kane ka jaitbynriew. Katei ka long katba kum ka kyrwoh, ba la soi da U Ma Vincent H Pala MP Lok Sabbha bad ba la phah da u Personal Assistant jong U MP, U Md Azeem.