Shillong: U MLA jong ka Voice of The People Party (VPP) na 17- North Shillong konstitwensi u Bah Adelbert Nongrum, ula pynpaw ia ka jingbymhun ha kaba iadei bad ka jingpynmih ka seng ia ki kyrtong iakhun MDC na 19 Jaiaw konstitwensi bad na Mawkhar Pynthorumkhrah Konstitwensi.
U bah Adelbert ula ong ruh, ba kum u nongmihkhmat u sngewdei ban kren halor ka nongrim kaba u don bad um lah ban shu sngap, namar kan sa pynmih ia shibun ki jingkylli, khamtam ha kaba iadei bad ka rai jong ka jingjied ia ki kyrtong jong ka Voice of The people Party (VPP) na ka bynta ka ilekshon MDC ka ban sa long shen, na ka bynta ki ar tylli ki Autonomous District Council ka KHADC bad ka JHADC.
Haba iakren bad ki lad pathai khubor mynta ka janmiet ka 15 tarik u Naiwieng 2024, na ka liang u Bah Adelbert ula ong, ba ka daw ba pynlong ia u kum u nongmihkhmat ban lum ia ka jingialang ka long halor ka jingjied jong ka VPP ia u Bah Strong Pillar Kharjana ban long kum u kyrtong napoh ka Mawkhar Pynthorumkhrah konstitwensi bad ia u Bah Denzil Raynard Chen napoh ka Jaiaw konstitwensi, ha kaba ula ong, “Nga burom ia kine ki samla rangbah bad ruh ia U Bah Ardent, hynrei ban jied lyndet nanga u MLA kam lah ban long”.
“Ngam don kano kano ka jingsngew pyrshah ia ka seng bad ia kine ki rangbah hynrei haba dei kaba iong ka dei ban long kaba iong bad haba dei kaba lieh kan dei beit kaba lieh”.
Ka jinglum jingialang jong u bah Adelbert mynta ka sngi ka long ban iamir jingmut halor ka jingmih kyrteng jong u Bah Babit, Bah Strong bad u Bah Nickson kiba la tyrwa da ma u kum u nongmihkhmat na 19 Jaiaw konstitwensi bad ka jingtyrwa jongu ka long kaba shai, ba ka State Election committee kan rai bad ka rai kan dei ka babha tam bad ka ba dei tam khnang ban kan long ka ba beit bad ryntieh ban nym iapher jingmut, hynrei ula pynshai ba myn ha ka 8 tarik kaba la khot ia ka state executive Committee bad kynsan kynsan la mih ka kyrteng ba na 19 jaiaw konstitwensi dei u bah Denzil Raynard Chen kaba la iaid beit beit sha ka state election committee khlem da iaid shwa na u kum u MLA bad kumiuh ruh u bah Strong uba la apply na Jaiaw konstitwensi u mih kyrteng pynban na Mawkhar pynthorumkhrah konstitwensi, bad kane ka la pynbuh bha ia u dak jingkylli u ba heh.
Ki paidbah nongshong shnong jong ka Konstitwensi ki ba ieid ia u Prah ki lyngngoh bad ki kylli, ba kane ka dei ka kam jong u MLA uba la tyrwa ia ki kyrteng jongki bad u ong shuh shuh “Sngewbha ia buromlang markylliang namar ngi don tang saw ngut ki MLA ha ka party kaei ba ki MLA jong kato ka konstitwensi ka ai jingmut ia hurom lem”, la bynrap u bah Adelbert.
Ula ong ruh, ba mynta ka long ka dak jingkylli kaba heh bha bad ka jingkydit, ha ka jingmih kyrteng jong kine ki artylli ki konstitwensi kam iahap, da ka ba u ong ruh, ba ka jingleh jong ka State Executive Committee ka long ka jingniew bein ia u kum u MLA bad ha ka 8 tarik ba la pynbna ia ki kyrteng, u la pyrshah bad ong ba um pdiang ia kane ka rai ia ka jingleh lyndet jong ka state ilekshon committee bad kumiuh ruh ka state executive committee.
Kumjuh ruh ula ong, ba ha ha ka 10 tarik ula phah da ka message sha ka State executive committee lyngba ka whatsApp group ba ha ka 11 tarik ula kyrpad ban nym pat rai eiei na ka bynta ka Jaiaw bad ka Mawkhar bad u ong shuh shuh “Hynrei kim shem la sngap ki rai lyndet beit na nga kum u MLA ban pynbna ia ki kyrteng jong ki kyrtong na Mawkhar bad Jaiaw”.
Shuh shuh u bah Adelbert ula pynpaw ka jingdom bad sngewlyngngoh, ha kaba u ong, ba hato ka party kam donkam mo ia u kum MLA bad ia ki para dkhot ban iatrei na ka bynta kajuh ka thong, da kaba ula buh jingkylli ba kaei ka daw ba pynlong ia ka party VPP ba kan leh lyndet.
haba ki mawkhar kim sngeweiei ki pdiang hun, balei une u bym dei na mawkhar un khuslai. sdang pyn ia pait kumne
wei ba la skhem eh ka nongrim lajong kim juh hun ia kaei ba kiwei ki ju iabeit lang