Pyrshah sa ka komiti trai dewiong, ia ka komiti NGT

Shillong, 7 Nailur:
Ka State Co-ordination Committee of Coal Owners, Miners and Dealers Forum (SCCCOM DF), ka la ia kynduh ia u myntri rangbah ka Jylla, U Mukul Sangma, ha ka sngi thohdieng ba ladep bad ha katei ka jing ia kynduh jongka, ka la kynthoh, ba wat la ka jingkhein pura ia u dewiong, ym pat shym la pyndep satia ha West Khasi Hills bad ha South Garo Hills, hynrei, ia uto uba la dep khein, uba don ha ki jaka buh dewiong, dei ban shah ban die noh khlem pynslem shuh.
Katei ka komiti, ka pynsngew shuh shuh, ba ia ka khajna, kaba dei ban siew sha ka sorkar, ka dei ban long beit thik, katba kum ka jingdon u dewiong, namar ba kan long kaba bakla ban shu siew ia ka khajna, khlem da pynthikna ia ka jingdon ba shisha jong u dewiong, uba dei ban die.
Ka komiti, ka sngew pyrshah ruh, halor ka jingbuh por, ba dei ban siew ia ka khajna sha ka sorkar, tang hapoh 14sngi, namar ba hadien ka jing pyntreikam ia katei ka jingkhang dewiong, kaba naduh ka 17tarik Iaiong 2014, ki trai par dewiong, ki don ha ka jingeh kaba khraw bad kaba jubor bha, ha ka liang ka jingdon pisa lem bad kiwei de ki jingeh kiba bun bad la ai jingmut, ba ki trai par dewiong, kin siew ia ka khajna kaba kat kum ka jinglah bor jongki bad katba kum ka jingthmu jongki, ban die ia u dewiong.
Ha kajuh ka por, la pynpaw ruh ia ka jingsngew lyngngoh, ba ha kiba bun ki jaka, ba ka komiti NGT, ka la leit ban jurip, hynrei ki kyrteng jong kitei ki jaka ba buh dewiong lem bad ki kyrteng jong ki trai jaka ruh, ym shym la pynrung satia, kum ki jaka ba don u dewiong bad la dawa na u myntri rangbah, ba kum ia kitei ki jingjia, ba ki trai kin leit biang ban iakren bad ban pynshai sha ki bor District bad ban bthah ruh ia ki bor District, ba kin ia trei lang bad ki par dewiong.
Ka Forum, ka pynkynmaw bad ka kyrmen ba u myntri rangbah ka Jylla, un bat ia la ka jong ka ktien, kaba ula kren ha ka jingiakren ha ka 29tarik Nailar 2014 ha State Central Library, ba ka sorkar Jylla, kan ia trei lang bad ki trai par dewiong bad ban pyllait, na kane ka jingeh, kaba ki ia kynduh ha kine ki sngi kiba mynta na ka jingkhang dewiong.
Ka kyrwoh, ka ong ba u myntri rangbah, ula sngap sngewkhia ia ki jingeh, kiba la leit rah sha u bad u kular ruh ban wad bad thaw lynti ban iarap ia ki jingeh, kiba la leit ban pynsngew da katei ka komiti.