“Pyrshah rel” mynta yn tur, ki sengbhalang sha Secreteriat

Shillong, 20 Jylliew:
Ki sengbhalang kin pynlong ia ka jingiashong kyrain lashai ka sngi ha phyllaw ka Additional Secretariat, Shillong ban pynpaw ia ka jingpyrshah ia ka jingshna ia ka lynti rel khlem pat pyntreikam ia ki lad pyrkhing ia ki mynder.
Kine ki sengbhalang ki kynthup ia ka FKJGP, HNYF, RBYF kin iamih paidbah lashai ha kaba ki la ioh permishon ruh na u Deputy Commissioner ban pynlong ia kane ka jingiashong kyrain naduh ka por 10 baje mynstep.
Haba iakren bad u nongialam ka HNYF, u Bah KS Rani u la iathuh ba kim kho lut ia ki dkhot hynrei la pynbeit ba kawei kawei ka seng kin wan 10 ngut eiei khnang ban lait na ka jingsahkut kali namar ba ka jaka ka khapngiah. Hynrei ha kajuh ka por, u la iawer lang ia ki paidbah kiba sngew khia ban wan iasnohkti lang ha kane jingiashong kyrain ain.