Pyrshah rel ka HYC

Shillong 05 K’lyngkot:
Ka Hynniewtrep Youth Council (HYC) ka la ong ba horkit hordang kan pyrshah beit ia ka lynti rel ban wan sha kane ka rilum Khasi.
“Kum ki rit paid ngi don ka Bengal Eastern Frontiers Act 1873 ka ain kaba iada ia ngi ha ka jylla” la ong u Bah Nickson Dohling u organizing secretary ka HYC ha ka jingialang sam khusnam ka seng ha Umjaiur ha kane ka sngi Nyngkong.
U la ong ba ka lynti rel ka lah ban pynbun ia ka jingwan buhai shnong ki mynder sha kane ka jylla.
Ka HYC Umjaiur Unit ka la sam khusnam ruh sha ki samla pule kiba jop ha ka jingiatainia halor ka phang, “Hato ka lynti rel kan wanrah ia ka roi ka par” kaba long ha kane ka sngi Nyngkong.
U Bah Dohling u la ong ba ka HYC ka la ai khusnam sha ki samla ba wan shakhmat ha ki jingpule na ka bynta ban ai mynsiem ia ki ban trei shitom.