Pyrshah pynrung kyrteng shipai ka UDP

Shillong, 6 Naiwieng:
Ka UDP ka la rai ban pyrshah jur ia ka jingpynrung nongthep vote ia ki briew kiba long artatien ha kane ka jylla.
“Ka long kaba sngew phylla ba kum kane ka la jia ha ka thain Madanriting,” la ong u working president ka UDP u Bah Paul Lyngdoh haba iakren bad ki nongthoh ha kane ka sngi Balang.
U la ong ba ka party kan pyrshah beit ia ka jingthmu ban pynrung kyrteng ia ki briew kiba long artatien kum ki nongshong shnong ka jylla kum ki nongthep vote.
“Ngi pyrshah ruh ia ka jingpynrung kyrteng ia ki shipai kum ki nongthep vote. Ngi dei ban sngewthuh ba ki shipai ki wan sha kane ka jylla tang shi por. Namarkata, kim lah ban niew kum ki nongshong shnong ba junom jong ka jylla” la ong u Bah Paul. Shwa ia kane, u MDC ka Nongthymmai u Bah Latiplang Kharkongor u la buh jingkylli ia ka jingpynrung kyrteng ia ki shipai kum ki nongthep vote ha kane ka jylla. U MDC ka Nongthymmai u la buh jingkylli hadien ba u la lap ba da ki spah ngut ki shipai ki la wan ban pynrung kyrteng kum ki nongthep vote ha ka thain Madanrting hynnin ka sngi. Haba sngewkhia ia kane, u Bah Kharkongor u la ialam ia ki nongialam shnong ka Madanrting hakhmat u Additional District Magistrate Bah Donny M Wahlang ban pyrshah ia ka jingpynrung kyrteng ia ki shipai.