Pyrshah pynduh Laitkroh MDC

Shillong, 2 Nohprah:
Ki paidbah na ka thain Laitkroh ki la pyn paw ia ka jingpyrshah hakhmat ka Delimitation Committee ban pynduh noh ia ka Laitkroh MDC constituency.
Mynta ka sngi ki riew rangbah ki nongialam na ki shnong bapher bapher ki la wan ban pynsngew ia kane ka jingieng jongki ha katei ka komiti kaba pynlong ia ka jingbishar paidbah ne public hearing ha MDC hostel, Shillong.
“Ngin pyrshah beit ia kane ka jingthmu ka KHADC ban pynduh ia ka Laitkroh constituency bad ngin sa peit nangne shakhmat kaei ka rai jong ka Eexcutive Committee jong ka KHADC”, la ong uwei u Bah Egenstar Kurkalang uwei na kiba wan ban iashim bynta ha katei ka jingpynlong ia ka jingbishar paidbah.
Ha kane ka sngi, la wan ruh ki briew na kiwei ki jaka tangba, ka jingdawa jongki, ka long ba dei ban shu pynbeit ia ka jingpynngat ia ki shnong na kawei ka constituency sha kawei pat.
Lah ban kdew ba ka KHADC ka la thmu ban pynduh noh ia ka Laitkroh constituency ban pynmih thymmai ia ka Umsning constituency. Ha kawei ka liang, ka Delimitation Committee ka lah ban aiti ia ka kakphod jongka sha ka KHADC shwa ka 13 tarik Nohprah.
“Ngi la pyndep ia ki jingpynlong ia ka jingbishar paidbah, ngin sa phah sa sha ka EC jong ka KHADC ban leh ia kaba donkam”, la ong uwei u dkhot ka Commmittee ha kane ka sngi Nyngkong.
Nalor ba la pyndep ia kane ka jingbishar paidbah ha Shillong, ka Committee ka la dep pynlong ruh ia ka jingbishar paidbah ha Nongpoh, Nongstoin bad ha Mawkyrwat. Lah ban kdew ba ka Delimitation Committee la thaw da ka KHADC, bad la bthah ba kan aiti ia ka kaiphod shwa ka taiew ba nyngkong jong u Nohprah.
Katkum ka jingong utei u dkhot, kam shym don satia ka jingpyrshah kaba jur na ki paidbah jong ka Ri-Bhoi, West Khasi Hills bad ka South West Khasi halor ka jingthmu ban phiah constituency.
“Lait noh tang ka jingpynbeit ia ki shnong ha ki katto katne ki jaka”, la ong une u dkhot ka Committee. Dei tang ki paidbah na ka thain Laitkroh kiba pyrshah ia ka jingthmu ban pynduh ia kane ka Laitkroh constituency.