Pyrshah Petrol Pump Umran sha U CEM

Shillong, 30 Lber:
Hadien ba la dep ujor sha u Deputy Commissioner ka Ri Bhoi District ha ka 27 Tarik Lber 2017, ka Joint Action Committee of Social Organizations kaba kynthup ia ka CSWO Umran Dairy Unit, ka CSWO Central Body, Laban, Shillong, Poor People’s Movement (PPM), Hynniewtrep Youth Movement, (HYM), Ri Bhoi People’s Movement (RBPM); ki dkhot ka JAC ha ryngkat katto katne ki nongshongshnong jong ka Umran Dairy, hynnin ka sngi, ki la leit pat ban iakynduh sa ia u CEM KHADC U Bah P.N Syiem bad kumjuh ruh ia u EM Trade, u Bah N.A War halor ka jingpyrshah ban tei ia ka petrol pump thymmai kaba ha Umran Dairy halor ki nongrim kiba biang.
Kane ka jingiakynduh jong ki seng ka long kaba seisoh ha kaba kitei ki rangbah, ki la shah skhor shisha ia ka jingud bad jingkyrpad jong u luk u lak kiba shong ba sah ha Umran Dairy.
Na ka liang jong ki, ki la kular ban shim khia kloi halor katei ka jingeh bad ban leh ia kaba donkam. Ka JAC of Social Organizations ka kyrmen ba na ka liang jong ki, kin pynsangeh noh shisyndon ia ka jingtrei jong katei ka petrol pump kaba dang iaid shaid shaid haduh mynta bad khamtam eh ban khot hajir ia u Rangbah Shnong, u Bah Lambor Bina.
Na ka liang ka seng, ki la dep ruh ban ia ka dorkhas sha ka Meghalaya Pollution Control Board bad kumjuh ruh sha ka NGT, kiba dei ban peit ia ka jing pynneh pynsah ia ka spah mariang.