Pyrshah kynriah DC ka KSU JH

Jowai, 18 Jylliew:
Ka KSU Jaintia Hills District ka pynrem jur ia ki riew khwan myntoi shimet bad ingkhong shyllangmat kiba donkti ha ka ban wad lad wad lynti ban pynkynriah kam ia u DC ka WJHD, U Ma P.S Dkhar(IAS officer). Ka seng ka la suba jur ba kane ka dei na ka jingkhang jong u DC ia ka jingkhlong ia u Mawshun ha Nongtalang kaba lah ban ktah ia ka iap ka im ki briew hangtei.
Kat kum ka jinglap ka seng, u Ma P.S Dkhar u dei uba ki briew ka thain Jiantia ki ia sngewthuh ban ia kren ha ki kam ki jam bad uba don ka mynsiem ban kyntiew ia ka jaidbynriew bad khamtam ha ka ban pynbeit ia u pud u sam bad ruh ban ai jingiada ia ki Khasi – Pnar kiba don ha ki thain Labang Nongphyllut bad Pangam Raliang(ne Block 1).
Ka seng ka pynpaw ia ka jingpyrshah jur jong ka ia ka jingthmu jong ka sorkar ban pynkynriah ia u briew uba tbit ha ka kam, khlem da kut ka samoi treikam jong u. Ka seng kan pynlong da ki jingiakhih ba jur lada ka sorkar ka niom da ka bor ia ka mon bad jingkwah jong u paidbah ka thain Jaintia. “U DC u trei na ka bynta ki Paitbah ym na ka bynta ka sorkar bad ki riew khwan myntoi shimet”, la pynpaw u President ka KSU JHDU, u samla Streamly. S Niangti. Kane ka long katkum ka kyrwoh na u Organising Secretary, U samla N. Sutnga.