Pyrshah ki samla pule ka NEHU ba wanrah Yoga bad Sankrit

Shillong, 28 Iaiong:
Ki samla pule ka skulbah North Eastern Hills University hapoh ka lama ka North Eastern Hills University Students Union (NEHUSU) mynta ka sngi ki la pynpaw ia ka jingpyrshah halor ka jing-wanrah ia ki tnat jingpule ha kane ka skulbah ki bym iahap satia bad ka jing-long jingman jong kane ka jaka.
Katkum ka jingpyn-paw jong kine ki samla, ka bor pyniaid jong ka NEHU ki la wanrah da ka jingpule kum ka Sanskrit, ka Yoga ki bym iahap satia khamtam ha ka ioh kam ioh jam ia ki samla. “Ki wanrah ia ki jingpule kum ka Sanrit, Yoga ha ka skulbah ki bym iahap satia ia ka jinglong kane ka thain bad ki bym don jingmyntoi ha ka ioh kam ioh jam jong ki samla”, la ong u nongialam ka NEHUSU u samla Rangdajied Marwein.
U samla Rangdajied u la ong ba kum ki samla ki pule kiba na kane ka thain mihngi, ki dawa ba ka sorkar pdeng bad ka bor pyniaid jong ka NEHU ki dei ban wanrah ia ki tnad jingpule kiba lah ban ai kam ai jam ia ki samla kum ka Toursim, Agriculture bad kiwei ki tnad jingpule kiban wanrah ia ka jingmyntoi ia ki samla ka thain.
U la kynnoh ba ki bor pyniaid ka NEHU ki khang lad ruh ia ki samla ban thaw ia ki kynhun ban pynlong jingmane katkum ka jingngeit jongki ban mane laitluid kumba la pynkhamti ka riti synshar ka ri India.
“Ha NEHU la sngew kumba im pynban ha ka juk jong u Tilak kiba khang pyrshah ia ki samla pule bad lada ki hukum ruh ba lada kim lah ban bud ia ki kyndon ba la buh da ka NEHU ki lah ban shah beh wat na hostel bad ban ban shain kuna ruh. Ia kane la pynmih hukum naduh u snem 2016”, u la ong.