Pyrshah ki nongkyrshan ka HSPDP ba trei shimet ia ki skhim

Shillong,5 Rymphang:
Ki nongkyrshan ka HSPDP na Nongstoiñ konstitwensi ki la pynpaw ia ka jingpyrshah halor ka jingkynnoh ba leh donbor ki nongkitkam ka seng khamtam haba iadei bad ka jingpyntrei kam ia ki skhim ha nongkyndong.
“Ngi ki nongkyr shan ka party HSPDP, ngi sngewlyngngoh haba iadei bad ki skhim MLA napoh ka C&RD block kaba ju leit sha ki paidbah, ba ka poi sha ki riew shimet ba kin pyntrei khlem da pyntrei ha ka rukom kaba dei,” la kynnoh u Bah Sure N Lyngdoh hynne ka sngi haba iakren bad ki lad pathai khubor.
U Bah Lyngdoh u la iathuh ba ia kine ki skhim MLA kiba napoh ka C & RD block la pyntrei da ki riew shimet kiba dei ki nongkyrshan ka HSPDP hi kiba dei ki nongkhaii dewiong.
U Bah Lyngdoh u la ong, ha ki por ba mynshuwa kam ju jia kumne ha kaba ka jingpyntreikam ia ki skhim ka long kaba biang bad kaba beit.
U la ong ba ki shnong kiba la shah iehnoh khunswet ki long kum ka shnong Tyllang, ki jaka jong ka Mawlangniang bad ki katto katne tylli ki jaka kiba marjan, bynrap u Bah Lyngdoh.
U Bah Lyngdoh u la iathuh ruh ba ki paidbah kiba ju kyrshan ia ka HSPDP kim iahap ia ka jingleh bym suidniew jong u MDC ka Nongstoiñ, Bah L.G Nongsiej ban shu ñiewbeiñ ia ki shiphew tylli ki polling station.
Kine ki shiphew tylli ki polling station ki long ka Marngor, Laitkseh bad Langiewbad kiwei, bynrap u bah Lyngdoh.