Shillong:U Chief Executive Member (CEM) jong ka Khasi Hills Autonomous District Council (KHADC), u bah Titostarwell Chyne, hadien shi sngi, ba u la wan ban leit jngoh ia ka iewduh u la iathuh, ba ki don bun bha ki bym don ia ka Trading license, khamtam lei kito ki bar jylla, kiba shu shong die madan, wat kito kiba shong ha ki dukan kiba dang thymmai ruh kim pat don ia ka trading license,kumta na ka liang jong ka Council, hi ka la bthah ba ki dei ban khang shwa ia ki dukan katba kim pat don ia ka trading license.
U CEM, u la iathuh ruh ba ki don pat kiba la shong slem kiba la don ia ka trading license kiba biang bad ki wan ban pynthymmai ruh ia ka trading license ka jong ki, manla ka por.
Na ka liang jong u CEM, u la buh ruh ka jingkyntu ia u Syiem jong ka hima Mylliem ba um dei shuh ban ai ia ka non objection certificate (NOC) ia kito ki bar jylla, kiba plie hi ia ki dukan ki jong ki khlem ki trading license bad ki dei beit ban pynduh ia ka NOC.
Haba iadei pat bad ka jingphah shithi jong kawei ka seng kaba la tip kum ka Meghalaya Greater Shillong Progressive Hawker and Street Vendor Association, kaba dei ka seng jong kito ki nong shongdie madan, ha kaba la soi kyrteng ruh da ki ar ngut ki nongialam jong katei ka seng kata ka kong S Thabah bad ka kong Biolin Pyrtuh kiba la kynnoh ba ka don ka jing pynkheiñ ia ka court order ha ba iadei bad ka jingleit kyndang ia kiba shong die madan da ki bor jong ka KHADC.
Na ka liang jong u CEM u la pynshai, ba ka konsil ka khlem leit ban kyndang ia kito kiba shong die madan, hynrei ki leit ban kyndang ia kito ki bym don laisen, la ki shong ha madan ne ha dukan bad haba kim don ia ka trading laisen ka konsil kan beh beit.
Haba iadei pat bad kito kiba shong die jing die ha ki madan u bah Titostarwell Chyne, u la iathuh ba ka konsil kam don bor, hynrei ki dei ki bor pyniaid distrik ban peit ia kito ki nong shong die madan.
U bah Titostarwell Chyne, u la buh ruh ka jingkylli ia kane ka seng hato ka kwah ban iada ia ki briew kiba nabar ne ia ki briew lajong? Ki kwah ban iada iano u la buh jingkylli.
U la iathu shuh shuh ruh ba ka konsil hi ka pyndonkam ia ka aiñ kaba la don lypa, ba kito ki bar jylla, la ki shong ha ki madan ne dukan ruh kim lah ban khaïi khlem ka Trading license, kata ka dei kaba ki hap ban sngewthuh, la ong u bah Chyne.
U bah Titostarwell Chyne, u la shim ruh ba kane ka jing phah jingthoh jong kane ka seng, ka long ka bym don nongrim bad kam don jingiadei ei ruh em bad kata ka court order, namar ka court order ka khlem ong ban ia shong katba mon bad leh katba mon, hynrei hap bud ryntih ia ki aiñ kiba la don.
Ki mendie die ri kiba iashah is u bar jylla baroh argut ki to ba dei na ka seng ki nong die madan
Ka ain la buh khnang ym tang ki mynder ri hynrei ia baroh kiba die kiba thied. Lada ki nongialam bad ki nongdie kim bud ia ka, Kan mih ka jingiakajia para ma ngi ba shong ba sah ha ri lajong hi.
Baroh ngi hap ban ia sngewthuh ba ym lah ban shu shong die jingdie kat ha ba ioh jaka namar ba dei ka ri lajong. Ngi dei ruh ban burom ia ki lynti ban iaid ki briew bad ki kali khamtam eh ki jaka ba dei ki jaka sah (residential area).
Nga kyrpad ia ki nongpeit ain ba kin peit ia kane ruh kumjuh.