Pyrshah ki kynhun niam, ia ka jingthaw ain iakhalai ka sorkar jylla

Shillong: Ka Shillong All Faiths Forum (SAFF), ha ka jingialang jongka, hynnin ka sngi, ka pyrshah jur, halor ka jingthmu jong ka sorkar jylla, ban pynlong ain, ia ka jing iakhalai.

Na ka liang ka SAFF, ka sngew ba ka Meghalaya Regulation of Gaming Rules 2021, kaba la pynrung shuh sa ka subsection (1) Section 29 jong ka Meghalaya Regulation of
Gaming Act, 2021, kan nang ailad ban plie ia ki jing iakhalai bapher kum ki casinos, ki ktem iakhalai ha kylleng ka jylla bad ka ban pynmih ia ki kam pyntriem ba har rukom bad ka ban pynjah burom, ia ka kyrteng ka jylla hi baroh kawei.

Ka SAFF, ka pdiang, ba ka donkam, ka jing ioh kamai kaba kham bun jong ka jylla, tangba ka dei ban wad da kiwei pat ki lad ki lynti, lait noh, na ka kam ia khalai, ong ka kyrwoh na U Revd. Dr. P. Lyngdoh, President bad U bah Noor Nongrum, Joint Secretary, SAFF.