Pyrshah ka UDP ba pynhap ia ki 5 shnong sha Mawsynram

Shillong, 19 Naitung:
Ka UDP Ranikor ka la kyrshan ia ki san shnong kiba pyrshah jur ia ka jingpynhap sha Mawsynram constituency ha ka MDC elekshon.
Ka Executive Committee jong ka party kaba long ha ka 17 tarik Naitung, ka la shim ia ka rai ban pyrshah jur ia kane ka jingleh jong ka Executive Committee jong ka KHADC ban pynhap ia ki san shnong kiba dei mynshwa ha ka Langrin comstituency sha Mawsynram ha kane ka kynti. Kine ki san shnong kiba pynhap sha Mawsynram ki long ka Domskhen, Mawlangroh, Nongthymmai, Trongpleng bad ka Raibah.
Haba pynlait khubor hynne ka sngi, u general secretary ka UDP Langrin circle u Bah GG Bung Snaitang u la ong ba ka jingpynhap ia kine ki shnong sha ka Mawsynram constityuency ka la ktah jur ia ka jingsngew jong ki paidbah kitei ki shnong kiba hap ha ka Block Ranikor.
Kane jingleh jong ka KHADC kam long kaba dei namar ba la shu pynhap khlem sngap ne pan ia ka jingsngew jong ki paidbah, la ong u Bah Bung ha ka kyrwoh.
Ka party kam sngew pher ei ei ruh ia ka jingsngap jar u MDC ka Langrin u Bah Mansturdy Nongrem halor kane namar ba u dei u ba don bynta lang naduh u snem 2007 ba la pynkhreh ia ka Bill hynrei donbok ba khlem urlong ha katei ka por.
Halor kane, ka UDP ka lathung komiti ruh ban iakren kham bha ia kane ka Bill hapoh ka jingialam u Bah PK Raswai.
Ha kajuh ka por, ka la sngew tynnad ia ka jingpynngat ia ki shnong kiba dei mynshwa sha Nongstoin hynrei la pynhap mynta sha Langrin MDC constituency.
Ka seng kan sa pynlong ruh ia ka jingialang na ka bynta ban iakren ban pynkhreh ia ka elekshon ha u 2014, la ong shuh shuh ka kyrwoh na u Bah Bung.