Pyrshah ka TMC Pynursla, ban pynrung hindi ha ki skul ha jylla

Shillong:Ka Pynursla Block-level Committee jong ka seng Trinamool Congress (TMC), ka kyntu ia ka sorkar Meghalaya Democratic Alliance (MDA) ba ka dei ban pynpaw ia ka jingpyrshah halor ka jingthmu jong ka sor kar pdeng ban pyn rung ia ka ktien hindi ha ki skul hapoh jylla.

Ha ka kyrwoh sha ki lad pathai khubor kaba lah pyllait da ka tnad pathai khubor (Communications cell) ka pynpaw ia ka jing pyrshah jur halor ka jing thmu jong ka Sorkar Pdeng ban pynbor ia ka ktien Hindi ha ki skul hapoh ka jylla, wat la ka tnad pule puthi jong ka sorkar Jylla ka dang iai ap ia ka jingpyntip ba thikna.
Ha ka kyrwoh, ki la kdew ba ka rukom pyrshang ban pynbsuh ia ka ktien Hindi ha ka Jylla ka long kaei kaei ka bym lah pdiang khlem da sngewthuh bad pynshong nongrim iaki jingeh ba kynduh ki khynnah pule, ban ia kren lei lei iaki nonghikai ka kham palat shuh.

Ki la bteng ba ka Block Committee ka TMC lyngba ka kyrwoh ba lah phah da u Block President Babu Jiten Khongwieng, ka kyntu ba ka sorkar Jylla kaba ialam daka NPP ha ryngkat ka BJP lem bad kiwei kiwei ki seng riewlum ba kin pynpaw lem ia ka jing bym mynjur jong kiba bun ba lang halor ka jingtip naka Sorkar Pdeng.
Ka long kaei kaei kaba yn sa shem shitom bha ha ki skul bapher bapher, khamtam eh sha ki thain nongkyndong namar wat ki subjek ba mynta ruh dang duna kiba nonghikai ba tbit ban hikai, kumjuh ruh halor ka jing bym biang ki skul.
U la batai da kaba bynrap shuh shuh, wat iaka tulop ki nonghikai ba bun dang sah teng ban siew da kaba wanrah sa kita ki nonghikai Hindi, katno kan long kaba eh ban pynbiang.

Une u nongialam uba lah long teng u nonghikai skul mynshwa, u ong ka kynti mynta ka dei ban ialeh shitom ban ioh pynrung iaka kyntien Khasi bad Garo ha ka Eight Schedule haka Riti Synshar ka Ri, la pynkut ka khubor la ong ka kyrwoh.