Pyrshah ka sur u paid ka Raid Shabong, ba ai nongkynti u Syiem ia ka Khun Longtrai Lai Kynthei

Shillong:Ka sur u paid ka Raid Shabong, Hima Khyrim ka la kynnoh ba u Syiem ka Hima Khyrim ula leh donbor ban shu pynkup ia ka Khun Longtrai Lai Kynthei ka Raid Shabong, ban pynkylla sha ka ri Kynti.
U chairman ka Sur U Paid ka Raid Shabong, u bah Phrangkupar Thabah, haba kren sha ki lad pathai khubor mynta ka sngi, u la kam ba ha ka 30 tarik Jylliew 2009, u Syiem ka Hima Khyrim ula ai don bor ia ka kot sha ka Kur Khun Longtrai Lai Kynthei ha kaba ula pynskhem ba ia ka Raid Shabong, la pynkylla noh sha ka Ri Kynti ban long trai ka kur.

Na ka liang ki riew rangbah kim pdiang ia kane, kaba la leh khlem ka jingtip u Sordar Raid, ka Dorbar Raid. U la ong ba ia ka jaka jong ka Raid la aiti sha kane ka kur bad ym don mano mano ba donbor tam lait na ka dorbar raid ban rai ia kano kano ka kam. U la ong ba kane ka Kur Khun Longtrai Lai Kynthei ka long tang ha ka niam ym ia ka jaka puta.

U bah Phrangkupar ula ong ba kane ka jingleh u Syiem ban pynkhamti nongkynti ha ka Khun Longtrai Lai Kynthei bad kila ujor ha ka kashari ka District Council ha kaba ka la pynsangeh ia kane bad ka hukum ban pynneh shwa kumba ju long. Ka kashari ka la pan jingshisha na ka Kur Khun Longtrai Lai Kynthei ba kan pynshisha halor kane bad ka la buh ban bishar biang ha ka 30 tarik mynta u bnai.
U la ong ba ki nongshong shnong ka Raid Shabong lada don kiba leh pyrshah ia kane ka rai ka kashari district council, ba kin leit ujor sha ka tnat pulit ruh.