Shillong: Ka kynhun ki nongdie madan, ka Meghalaya Greater Shillong Progressive Hawkers and Street Vendors Association (MGSPHSVA) mynta ka sngi, ki la kynnoh ba ka sorkar, ka pyrshah ia ki nongdie madan ban sdang die jingdie ka dei halor ka nongrim ba ki nongdie madan kim donkam siew khajna sha ka sorkar.
Na ka liang ka kong L Marbaniang, kaba dei ka dkhot ka MGSPHSVA, ka la kynnoh ruh ba ka sorkar ka la shah ia ki dukan heh naduh Khyndai Lad haduh Iewduh, ban plie, namar ba ki dukan ki siew khajna sha ka sorkar; hynrei ki nongdie madan kim donkam siew bad kane kam pynioh nong ia ka sorkar, namar kata ka sorkar kam pynsngew iaka jing dawa ki nongdie madan.
“Balei kane ka khlam ‘COVID-19’ ka ktah tang ia ngi kiba die madan hynrei ia kiba don dukan heh kam ktah mo?” la buh jing kylli ka kong Dafi, kaba dei ruh ka dkhot ka MGSPHSVA.
Nalor kane ka kong L. Marbaniang, ka la ong ruh ba ka sorkar ka dei ban ai lad ia ki ban sdang ia ka jing iadie iathied jong ki na ka bynta ban pynbiang ha ing ha sem lym kumta satang lano bun kin iap thngan.
Ka kong L. Marbaniang, ka pynpaw ruh ba bun ki bor pulit bad ki seng samla kiba ju wan beh ia ki, ba shong die madan bad ki ju kren tohmet bha iaki nongdie madan hynrei kim ju pynsngap ia ki kyntien tohmet namar ki donkam ban kamai ban pynbiang ha ing ha sem.
Haba ym shym la aibor ban shong kumno hi yn shu shim khajna, haba kren da pyrkhat artad ym ban shu kren ruma rutit tang ban ioh jingkyrshan khlem nongrim pat.