Shillong, 12 Naitung: “Na ka liang ka Dorbar Shnong Mawsyn ram ka pyrshah ia ka jingthmu ban pynlong leh niam ka Seng Khasi Hima Mawsynram, kumba la paw ha ki lad pathai khubor ha ka 15 tarik mynta u bnai ha jaka ba don ka Krem Mawjym buin bad kumjuh ruh ban sieh ia ki SignBoard ha katei ka jaka”, la pynpaw pyrsha ki dkhot ka Executive Committee ka Dorbar Shnong Mawsynram kiba la pynpaw ruh ia ka jing lyngngoh bad kyntait ia ka jingkam trai ka Seng Khasi Hima Mawsynram ia ka Krem Mawjymbuin bad kdew ruh ba katei ka jingkam trai ka long ka ba ym don nongrim haei haei ruh.
“Ngi la wan ia kynduh ia u Deputy Commissioner bad na ka liang jong ngi ki dkhot ngi la kyrpad ia u ban peit ba yn nym don mano mano ba lah ban rejister ia katei ka jaka kaba don ha shnong Mawsynram kaba long kum ka jngohkai pyrthei ha katei ka shnong kaba la ioh ia ka nam kum ka shnong kaba ioh pdiang ia u slap ba jur tam ha ka pyrthei”, la ong shuh kitei ki dkhot ka Executive Dorbar shnong Mawsynram. “Ka Krem Mawjymbuin ka dei ha ka jingpeit jingsumar jong ka Dorbar Shnong naduh ki pateng kiba la dep”, la ong u General Secretary ka Dorbar Shnong u Bah PW Shangpliang.
“Ka jingkam ka Seng Khasi Hima Mawsynram ba ka long trai ia ka jaka bad ka Krem Mawjymbuin ka long kaba ym don nongrim bad ka jingkam jong ka ba la dep rejister ia katei ka jaka bad ka krem Mawjymbuin ha ka kyrteng ka Seng Khasi Hima Mawsynram ka long kaba ym don jingshong nia haei haei ruh namar ym don ki kot ki sla kiba pynshisha ia kata”, la ong shuh u General Seretary. “Lada ka jia kumta ruh kaei kaei baroh la shu leh buit poh da u ta u President ka ta Seng Khasi Hima Mawsynram uba la paw kyrteng kum u ta u Tylli Myrthong , u ba ju bat kum u Secretary ka Dorbar Hima ha ki snem ba la dep”, la ong shuh shuh u Bah Shangpliang.
“Ha ki por ba la dep ki dkhar na ri thor ki ju wan leh “ýatra” ha ka krem Mawjymbuin ia kaba ka shnong ka shah namar ha ka jingpyrkhat ba ka ri India ka dei ka ri kaba don shibun ki jait niam bad ka la don ki jingpyrshah na ka liang ki Seng Bhalang ruh bad ngi la pynshai ia ki ha katei ka bynta”, la ong shuh u Bah Shangpliang u ba la iathuh ruh ba na ka jingthmu ha ka 15 tarik ka Dorbar Shnong kan ieng pyrshah beit ia ka jingthmu ka Seng Khasi Hima Mawsynram kaba ym don jingithuh na ka liang ka Dorbar hynrei la shu iohi ha ki khubor.
“Ka krem ka hap ha ka jingpeit ka Dorbar . Ka jingkam ka Seng Khasi Hima Mawsynram ka dei ka kam kaba ym don nongrim haei haei ruh bad na ka jingthmu jong ka ban pynlong ia ka jingleh niam ngi la ai jingthoh sha u Deputy Commissioner ka East Khasi Hills kumjuh sha u Superintendent ki Pulit bad u Director General of Police kumjuh”, la ong u Bah RH Rapsang u ba long u Executive Member ka Dorbar Shnong kumjuh u wei na ki Rangbah Dong ha kawei ka Dong jong ka Shnong Mawsynram. “La shu leh buittuh da u Tylli Myrthong bad ka jing reister ia ka society na kino ki kynhun ka ia pher na kaba rejister ia ki jaka ki puta”.
Halor ki jingkynnoh ba U Syem ka Hima Mawsynram u Paiem Amos Malangiang ba u la pynkhamti ia katei ka jaka ha ka Seng Khasi Hima Mawsynram, u Bah Rapsang u la ong ba na ka liang u Syiem u la kyntait ba ka don kum katei ka jingiakynduh bad ka Seng Khasi Hima Mawsynram hadien ka jingialeit ia kynduh ki dkhot ka Dorbar Shnong ia u Syiem. “Ngim iohi ia ki kot ki sla kumno ngin pynshisha ia ki jingkynnoh bad ba u Syiem u kyntait ia kiei ki jingiadei bad ka Seng Khasi Hima Mawsynram bad la shu leh buttu da u Tylli Myrthong“, la ong u Bah Moon Marbaniang u ba dei u Rangbah Shnong ka Shnong Mawsynram.
“Ngin khot sakhi da u paidbah ha ka 15 tarik bad ngin ialeh pyrshah ia ka jingthmu ka Seng Khasi Hima Mawsynram kaba thmu kum ka jingleit plie ia ka Krem Mawjymbuin kumba ka kam nongkynti jong ka . Na ka liang ka shnong kam tuklar ia ki ingtreikam ki Society hynrei kan ym ailad ia ki kynhun niam ban kam trai ia ka Krem Mawjymbuin kaba long ka jingsarong ia ka shnong kaba khring ia shibun ki nongwan jngohkai pyrthei”, la ong shuh shuh u Bah Rapsang.
“Ngin ym ailad da lei lei ruh bad ka dorbar hi baroh kawei ka rai kumta namar ka long kaei kaei kaba lyngngoh ba kiwei ki tnad Seng Khasi na ki shnong bapher jong ka Hima Mawsynram ki kyntait ruh ban ithuh ia ka Seng Khasi Hima Mawsynram. Kumno kan lah ban rejister ia ka jaka khlem ka No Objection Certificate na ka Dorabr Shnong?”, la pynkut u Bah Rapsang u ba la pynpaw ruh ba ka Dorbar Shnong ha ka dorbar ba la pynlong ki khun ki hajar ka Shnong ki dap jingsngewkhia halor katei ka jingshah kam trai ka Krem Mawjymbuin da katei ka Seng Khasi Hima Mawsynram.
Phi don ban ong eiei?