Pyrshah ka seng ot doh masi, ba khang ka BJP

Shillong, 06 Iaiong:
Ki nongot doh masi hapoh ka lama ka Khasi Jaintia Butchers Welfare Association (KJBWA) ka la pyrshah jur  ia ka jingthmu ka sorkar BJP ban khang shoh doh masi ha ka ri.
Ha ka kyrwoh ba la pyllait mynta ka sngi Nyngkong u General secretary ka seng u bah T Nongsteng u la ong ba kane ka jingthmu ka BJP ym lah satia ban pdiang ia kane ka rai donbor ban khang shoh doh masi.
Kumba baroh la iatip ba ka doh masi ka dei kawei ka jait doh kaba ki briew kane ka jylla ki ieid bad smat bha ban bam ia ka ym tang ha kane ka jylla hynrei ha baroh kawei ka Dong Mihngi ka India.  Kane ka jingleh ka BJP kan ktah jur ia ki nongshoh doh kiba don da ki hajar ngut ha kane ka jylla.
Halor kane, ki nongkhaii doh masi, ki la kyntu ia ka sorkar jylla bad ia u MP ka jylla u Bah Vincent H Pala ba kin iakren bad ka sorkar pdeng ban sangeh ia kane ka jingthmu.
Ka seng ka la ai ia ka jingiatreilang ruh bad ka KSU kaba la kloi ban mih shakhmat ban pyrshah ia kane ka jingthmu ka sorkar BJP ban khang shoh doh masi ha baroh kawei ka ri, la pynkut ka kyrwoh na u Bah Nongsteng.