Pyrshah ka RBYF bad CoRP, ban ithuh ia ki Bangladeshi kum ki trai shnong

Nongpoh, 22 Jymmang:
Ka Ri-Bhoi Youth Federation (RBYF), Um trai Circle, lem bad ka jingsnoh kti lang ki Rangbah Shnong ka thaiñ, ki la pynpaw ia ka jingpyr shah kaba jur halor ka rai jong ka Meghalaya High Court ba ki phetwir Bangladeshi kiba la wan sah shipor ha Panbari Amjong, ki dei ban ioh ia ka hok kum ki nongshong shnong ba pura. Ha ka kyrwoh ba la phah da u Bah S.B Marbah, uba long u president ka circle bad uba long ruh u assistant education secretary ka seng kmie, u la ong ba kine ki briew ki la roi stet ha kine ki sngi ha katei ka thaiñ, ym tang na ka jingkha jong ki man u snem, hynrei ki la roi ruh namar ka jingwan buhai shnong da kiwei pat kiba wan na kiwei ki jaka, kiba dei kiba haïing hasem, ki paralok bad kiwei kiwei.
Ka Panbari ka hap hapoh ka Raid Amjong bad ha ka Hima Khyrim, hynrei ka jingwan kitei ki Bangladeshi bad ka jingkhot jong ki ia ki briew ba thymmai ban shong ban sah ha katei ka jaka, ka la wanrah ia ka jingma kaba khraw ia ki paidbah nongshong shnong, khamtam ba

ki don ki jaka ba ki rep ki riang ki la shah knieh ha kitei ki nongwan wir.
Ka jingbym shngaiñ ka long ruh ba kitei ki phetwir hadien ba ki la sngewskhem ia ka jinglong shnong jong ki, ki la ialam briew thymmai shuh shuh bad ki dei ruh ki briew bym lah ban ithuh, la ong u Bah Marbah.
Kumta ka seng ka kyntu ia ka Meghalaya High Court ba ka dei ban pynphai shuwa ia kitei ki Bangladeshi sha Bangladesh kiba la wan shong be-aiñ sha katei ka jaka naduh ki snem 1971, kiba wan hadien ka 24 tarik Lber jong katei ka snem.
Lada ka High Court jong ka jylla kam lah ban leh ia kata, ka mut ba baroh ki nong Bangladesh kiba wan shong shnong ha kane ka jylla ki la dei ki nong India, ym shuh ki nong Bangla, u la kynnoh.
Ha kaba iadei bad kane, na ka liang ka RBYF lem bad ki Rangbah Shnong, ki la ong ba lada ka High Court kam lah ban leh ia kane, kim banse ban iaid noh da kawei pat ka lynti kaba tyngeh, ban pynsngewthuh ia ka jingleh jong ka Meghalaya High Court, kaba ñiew bad ithuh ia kitei ki phetwir kum ki trai shnong.
Ha kawei pat ka liang, ka CoRP ruh, lyngba u working president jong ka, u Bah Bandary Ryntathiang, ka la ong ba ka jingithuh jong ka Meghalaya High Court ba ki phetwir (refugee) Bangladesh kiba wan shong shipor ha Panbari, Amjong, ka long kaba kum ka seng ka pyrshah jur halor kane, namar katkum ka jingtip ka seng ka long ba u Syiem ka Hima Khyrim ha ki por ba mynshuwa, u la shu ai jaka sah shipor ia kitei ki phetwir, hynrei kaba sngewsih ka long ba ha kine ki sngi na ka liang ki bor bahalor ka jylla ki kwah ban ithuh noh ia kitei ki phetwir ba ki dei ki trai shnong.
Kumta ka seng ka pyrshah ia kane bad kan ym ailad ba kine ki jingithuh ia kitei ki phetwir kan treikam bad ka seng kam banse ban shim da kiwei ki lad ki lynti lada katei ka jingithuh trai shnong ia kitei ki phetwir lyngba ki bor bahalor ka jylla kan urlong, u la ong.