Pyrshah ka Pommura ia ka dukan khor, u bah Ernest

Pommura, 17 Jymmang:
Ka Dorbar shnong Pommura, Khyrim Syiemship, East Khasi Hills District ka pynpaw ka jingpyrshah kaba jur ia ka jingbuh Wine store jong u bah Ernest Mawrie hapoh ka shnong Pommura ha ka jaka kaba khot Umnong neng 12 mer kaba don ha khappud bad ka shnong Mawryngkneng hadien ba ka wine store barim ka jong u ka la shah khang khyrdep ha ka tnat Excise lyngba ka kyndon ain ba thymmai jong ka Excise Act jong ka sorkar jylla.
La kynnoh ba katei ka jingbuh Wine Store ka dei kaba la iaid lait na ka bor shnong khlem ka jingbit na ka shnong.  Haba iadei bad ka jingbuh wine store thymmai u bah Ernest Mawrie ka Dorbar shnong ba la long ha ka  19 tarik u iaiong da kawei ka jingmut  ka lah shim ka rai ban pyrshah jur halor ka jingbuh ia kane ka winestore ha katei ka jaka bad ka Dorbar ka la rai ban pynduh pyndam noh shishyndon wat ia ka NOC  kaba ka shnong kaba la soi da ki nongialam shnong kiba rim, namar ka shnong ka lap ba ka jingdon jong ka Wine store kaba mynshwa ka lah pynkharoi ia shibun ia ki dukan kyiad hapoh u pud u sam jong ka shnong Pommura bad wat ki shnong ba marjan ruh kumjuh bad kumjuh ia ki jingsniew ba harukom hapoh ka shnong kaba lah wan rah shibun ki jingeh ia ka Dorbar shnong ban teh lakam ia ki jingsniew hapoh ka Imlang sahlang,ong ka kyrwoh khubor.
Nalor katei ka rai ka Dorbar shnong ruh ka lah leit ban iakynduh ia u Deputy Commissioner ka East Khasi Hills District u bah PS Dkhar  bad ai ruh da ka jingthoh ia ka jingpyrshah jong ka shnong ia ka jingbuh u bah Ernest mawrie ia katei ka dukan die khor lane ka Winestore ha katei ka jaka bathymmai bad pyntip ruh ba ka shnong ka lah weng ia ka NOC ba ai ban shna wine store mynshuwa.