Pyrshah ka MPF ba thung dkhot u lamphang tang ki MLA liang synshar

Shillong, 2 Jylliew:
Ka Meghalaya People’s Front (MPF) ka kynhun liangpyrshah hapoh ka iing dorbar thaw ain, kan sa khot ia ka jingialang jong baroh ki MLA liangpyrshah ha kane ka taiew ban iakren ia ka rai jong u lamphang ban shu thung dkhot tang ia ki MLA ka liangsynshar, ha ki komiti bapher bapher jong ka dorbar Jylla.
“Ka rai jong u Lam phang ka iing durbar ka long kaba sngew phylla bad ka bym iahap. Ngin khot ia ka jingialang jong baroh ki MLA liangpyrshah ha kane ka taiew ba iakren ia kane ka kam. Ki MLA baroh kynthup na ka HSPDP ruh kin iadon lang ban iakren ia kane ka kam” la ong u nongai ktien ka MPF u Bah Paul Lyngdoh ha kane ka sngi u Blei.
Katkum ka rukom, u Bah Paul u la ong ba ka jingkitkhlieh ia ki komiti bapher bapher jong ka iing durbar thaw ain, dei ban ai lang ka bhah sha baroh ki MLA kynthup jong ka liangpyrshah.
‘Ha ka jingpynbna ba dang shen, u Lamphang u AT Mondal u la rai ban leh pyrshah ia ka rukom pyniaid ba ju leh da kaba thung ia ki MLA ba dei tang na ka liang synshar ban long ki dkhot jong ki komiti bapher bapher”, la ong u bah Pual.
U la ong ba ki MLA ka liangpyrshah kim ym shah ia kane ka rukom leh u Lamphang ka Iing durbar thawain ban shu iuh roit ia ka hok jongki.