Pyrshah ka KSU Laban ba leh shiliang khaw tad

Shillong, 22 Rymphang:
Ka khasi Students Union Laban circle ka pyrshah bad kam iahap satia Iaka jingleh jong ka sorkar halor ka skhim marbam tad ne ka National Food Security Act 2013, ha kaba la mih shibun ki kynrum kynram kiba la ktah mationg ia ki trai ri muluk.
Kaba kham lyng ngoh shuh shuh ka long ba ki trai ri trai muluk  kiba don ia ka hok ban ioh bynta ha ka National Food security Act ki la shah kyntaid mardor bad kane ka wanrah ia ka jingsah umdum kaba pynshaiong ia kiba bun ki balang.
Ka seng ka pynpaw ia jingpyrshah kaba jur ia ka sorkar ban iaid shakhmat halor kane ka kam bad ka sorkar ka dei ban pynsangeh shwa  bad ban pynbeit shwa ia ki kynrum kynram khnang ba ki  donhok ban ioh kin ym shah ktah ne pynduh ia ka hok kaba dei ban ioh.
Kumba ka long mynta kiba bun hi kiba ioh ki dei ki bar jylla  katba ki trai ri trai muluk ki shah kyntaid bad shah ieihbein, ka jingkylli mynta ka long ba hato ki trai ri trai muluk  kim bit dor satia  ban ioh ia kane ka hok kaba la wan na ka sorkar pdeng ne hato dei tang ki bar jylla ne kiba duk bad dei tang ma ki kiba dei hok ban ioh?.
“Ngim pyrshah satia ia kita ki bar jylla kiba dei hok ban ioh  hynrei ngim lah bna pdiang pat ia ka jingduh noh ki trai ri trai muluk  bad kane ka ktah ia ka khiewja jong kiba bun ki longiing hapoh ka bri u hynniewtrep”, la ong ka KSU Laban circle.