Pyrshah ka KSU, ia ka bhah pule doktor

Shillong, 07 Nailar: 
Ka KSU  ka la pyr shah ia ka jingai bhah ia ar tylli na ka bhah ka jylla ia ki khun ki kti jong kiba trei ha NEIGRHIMS.
Hadien ba la iohi ia ka jingmih ha ki lad pathai khubor, u chairman ka  KSU Education Cell u Bah Donald V Thabah u la ong ba ki sngew lyng ngoh ba la shim noh ia ka bhah jong ka jylla haduh ar tylli ban ai pat sha ki khun ki kti kiba trei ha NEIGRHIMS, nalor ba ka jylla ka dang donkam shuh shuh ia ki doktor.“Naduh u snem 2012, ngi la iai pyrshah ia kane ban ai bhah ba dei na kane ka jylla.  Ngi la rah ia kane sha ka tnad Health and Family Welfare bad ruh sha ka sorkar jylla ban pynpaw ia ka jingbym iahap bad ka jingai bhah kaba duna palat”, la ong u Bah Thabah haba kren hynne ka sngi sha ki lad pathai khubor.
U la ong ba katkum ka jinglap ka jingtip da ka RTI , ki kot ki sla la pyni ba ha u snem 2013,  ki don  57 tylli ki jaka pule doktor ha katei ka hospital kaba don ha Meghalaya.“Na kine ki 57 tylli ki jaka pule, 22 tylli ki dei ka bhah na ka sorkar pdeng bad sa 35 tylli ki dei na ka bhah jong ka jylla”, la ong u Bah Thabah. ”Namar ba ka bhah la buh ruh ia ki khun ki kti jong ki doktor ba trei ha  NEIGRHIMS, ka long kaba donkam ia ka sorkar pdeng ban ai bhah shuh ia ka jylla ha jaka ba kan knieh pynban ia ka bhah jong ka jylla” u la ong.“Ka jingleh ka long ka bym dei, bad kaba shah shiliang namar ba 57 tylli ki jaka pule kim pat biang ban ai bhah ia ki samla ba kwah ban pule doktor MBBS ha ka jylla” la ong u Bah Thabah. U la ong ba ka jingai bhah ia ar tylli ki doktor ba trei ha NEIGRHIMS ka dei ka jingduh nong ia ka jylla bad u la kyntu ba ka bor pyniaid ka NEIG RHIMS  ka dei ban dawa bhah kyrpang ia ki khun ki kti jong ki doktor ba trei ha kane ka jaka pule doktor.
U chairman ka Education Cell ka KSU u la ong ba kin leit iakynduh ia u myntri ka koit ka khiah u Bah AL Hek ban pan jingshai halor kane.