Pyrshah ka KSU, ban weng Residential School na Laskein

Jowai, 4 Lber:
Ka KSU Laskein Circle ka la pynpaw ia ka jingpyrshah jur halor ka jingthmu ka Sorkar ban pynkynriah ia ka jingtei ia ka Residential School na ka shnong Laskein sha Shangpung. Kum ban shu pynkynmaw,   hadien ka jingleit jurip ki briew sorkar  ia ka Laskein block, la jied ia ka shnong Laskein kaba dei ruh ka jaka ha kaba ka Ophis jong ka Block ka don ban ioh iaka ne ka Skul.
‘’Lada ka sorkar ka don jingthmu shisha ban pynkiew ia ka pule puthi bad jingnang jingstad hapoh Laskein Block, ka dei ban pynneh ia kane ka Residential School ha Laskein namar kane ka shnong ka long ka jaka pdeng ia baroh ki shnong hapoh ka Block bad kiwei ki shnong ba jngai kum Mukroh, Saba, Psiar, Khadkasla, Thangrain  bad ruh ka jan khamtam sha kito ki jaka ba dei na Pangam Raliang/Labang Nangphyllut (Block 1)  kiba long ki jaka kiba dang duna bha ha ka jingdon kiba leitskul bad kiba niewkor ia ka pule puthi ‘’ la pynpaw u Samla Leningrad Tariang, General Secretary KSU Laskein Circle. “Ka shnong Laskein ka  la dep pynioh ruh wat ia ka jaka ban tei ia kane ka skul ha ka jingwan jurip jong ki briew na ka tnad Pule Puthi (Education Department) iaka jaka kaba biang ban tei iakatei ka skul. Ka jingthmu pynkynriah ia ka jaka tei ia kane ka skul sha Shangpung ka pynlyngngoh kynsan ruh ia kiba bun bad ka pynsuba jur ruh ba ka lah ban don kiei re kiei kiba thom ia ka jingshisha na lyndet” ong biang utei u samla .
   
Katba u Samla Justice Paul Lyngdoh Education Secretary ka KSU Laskein Circle pat ula ong baka KSU ka pyrshah jur ia ka jingthmu ban  pynkynriah ia kane ka Skul sha kiwei ki jaka khamtam kiba la long kham sor bad ha kajuh ka por ka Seng ka kyntu jur ia ka tnad pule puthi khamtam ia u Myntri ka Tnad Pule puthi ban pynneh ia kane ka skul ha kane ka shnong. Ka kyrwoh khubor ka la kam ruh ba ka Shnong Shangpung kadei ka shnong kaba ka kiew lypa ym tang haka liang ka roi ka par hynrei wat haka liang ka pule ka puthi ruh, kumta kam lah ban long ba iakatei ka School kaba la mang kyrpang naka bynta ki Thain nongkyndong daka Sorkar kmie yn leit rah ei sha Shangpung kaba la long ka shnong kaba kham Sor lypa. Ka Seng KSU Laskein Circle ka kyntu jur ia u Ma Robinus Syngkong, MLA ka Mowkaiaw Constituency ban peit ia kane ka bynta na ka bynta ka bha ka miat jong ka Thain ba un ia said ia kane ka mat hapoh ka Iingdorbar Thawain kaban sa long shen bad ka Seng ka kyrpad ruh ia ka Synjuk. Ki Rangbah Shnong Elaka Raliang ban ia snoh kti lang ha kane ka bynta.