Pyrshah ka KSU, ban pynduh ia ka bhah pule MBBS

Shillong,12 Jymmang:
Ka KSU Central body ka la pyrshah jur ia ka rai ka sorkar ban pynlong da ka  jingiakhun eksamin, na ka bynta ki samla ba kwah ban leit pule  MBBS, ha kaba ka la kynnoh ba ka sorkar ka la shim kyrkieh ia katei ka rai khlem da ailad ia ki samla pule ban tip lypa, namar ba la pynbna ia katei ka rai hadien ka Resol ym shuwa ka Resol.
U General Secretary ka KSU u samla Auguster Jyrwa haba ia kren bad u Rupang u la ong ba ka KSU ka pyrshah jur ia katei ka rai ka sorkar namarba katei ka rai kan ktah ia ki samla pule na kane ka jylla. U la ong ruh ba ka KSU ka pyrshah lada ka sorkar ka pynduh ia ka bhah (Quota) ba ka jylla ka ju ioh.
Ka KSU ka la dawa ruh ba ka sorkar ka dei ban pynshai ha kano ka rukom kan pynlong ia katei ka Eksam, namarba ka la kam ba haduh mynta ki samla pule kim pat ioh jingshai ka sorkar kan pyniaid kumno ia kitei ki eksam.
Halor katei ka jingeh ba ki samla pule ki ia kynduh na ka liang u General Secretary ka KSU u la ong ba ka seng kan sa leit ban ia kynduh ia u Myntri ba dei peit ia ka koit ka khiah ha ka jylla, ban ia kren halor katei ka mat.
Ha kawei pat ka khubor
Na ka liang  ki kmie ki kpa ki samla pule ruh ki la pyrshah jur ia katei ka jingshim rai ka sorkar ban pynlong Entrance Eksam ha ka MBBS bad BDS,  ki la ong ba kane ka rai jong ka sorkar ka shu long hak dak bad kane ka Exam ruh kam long kaba shai bad kaba lah ban sngewthuh ia ka jingmut jong ka.
Ki la ong ruh kat kum ba iohi ha ki kot khubor ba u Director jong ka Directorate of Health Service (DHS) u bah E. Dkhar um shem ai ia ka hukum kaba u la ioh na ka sorkar kmie bad ki khlem iohi ruh ia ki ain ki kyndon jong kata ka Entrance Exam. Kumta halor kane, ki kmie ki kpa ki pynpaw ba ki kwah ban tip shai ia kita ki shithi No ne ki kyndon jong kata ka hukum ba ka DHS kala ioh na ka sorkar India. Kila ong ruh lym kumta kin  ym pdiang ia kane ka rai ka sorkar.
Hynrei lada ka long pat kaba shisha kine ki kmie ki kpa ki kyntu ia ka DHS ba ka dei ban pyntrei kam ia kane ka ain ha ki snem ki ban wan da kaba ai jingtip shwa sha ki samla pule na ka bynta kin ioh ban pynkhreh lypa. Shuh shuh ki la kyntu ruh ia ka sorkar khamtam ia ka DHS ba lada long kaba lah dei ban pyndam shi syndon ia kane ka exam mynta u snem bad leh lane jied kat kum ka merit list kaba kila pass kumba juh leh baroh shi katta, pynkut ka kyrwoh na ki kmie ki kpa jong ki samla ba thmu leit pule ia ka lain Doctor na Ri Lum Jaintia kiba kynthup ia u bah C. Lyngdoh, bah L. Ryngkhlem, kong D. Rymbai bad kiwei de.