Pyrshah ka KSU ban buh ktem shipai ha Umran

Nongpoh, 27 Risaw:
Hadien ba la mih ka jingpyrshah na ki sengbhalang, seng long kmie bapher bapher ia ka jingthmu buh ktem ki shipai Assam Rifles ha Umran, Ri-Bhoi, mynta pat sa ka KSU Umran unit ka la pynpaw ia kane ka juh ka sur. Kane ka jingpyrshah ka KSU ka long hadien ba kiwei ki  kynhun ki la dep pynpaw ia ka jingpyrshah naduh mynshwa.
U President ka KSU Umran Unit u Bah Banteilang Mukhim   u la ong ba ka seng ka ai ia ka jingkyrshan ba pura ia ka seng jong ki longkmie Umran kiba la pynpaw iaka jingpyrshah pyrshah halor ka jingthmu jong ka Assam Rifle ban buh ktem hapoh jong katei ka shnong.
U la ong ba ka seng ka la ioh jingtip ba ki kot ki sla ki la don hapoh ophis ka DC Nongpoh bad ka seng ka la dawa na ka DC Ri Bhoi ka Dr.Pooja Pandey ba kam dei ban pdiang ia kane ka jingthmu buh ktem ki shipai.
U la ong ba ka seng kan ieng pyrshah ruh lada don kano kano jingbishar paidbah kaba dei katkum ka section 9(A), bad da lei lei ruh kum ka seng kan nym ailad ia kum katei ka jingthmu jong kane ka tnat shipai.