Pyrshah ka KSU, ba thmu thied jaka ki shipai ha Ri Bhoi

Nongpoh, 02 Nohprah:
Kumba la mih ka jingpyrshah halor ka jingthmu ki shipai ka Assam Rifle ban buh ktem hapoh ka shnong Lawbyrwa bad Lawpyllun ba hap hapoh ka Raid Mawbuh, Ri Bhoi District, mynta ka sngi ki nongialam ka KSU, North Khasi Hills District, ha ryngkat ki ki trai jaka lem bad ki nongialam shnong jong kitei ki ar shnong, ki la leit ban kynduh ia u ADC ka Ri Bhoi, u DP Kharsati bad ha kane ka sngi ki la phah ruh da ka dorkhas ban pynpaw ia ka jingpyrshah halor jong katei ka jingthmu shim jaka da ki shipai ka Assam Rifle.
Ha kane ka jingleit iakynduh ADC, ka KSU, NKHD, kaba la ialam khmat da u president ka KSU, NKHD, u samla Ferdynald Kharkamni, u samla Lambok Rymbai, u Bah Pius Pathaw , Rangbah shnong ka Lawpyllun, u Bah A. Lyngdoh, Asst. Secretary ka Lawbywa lem bad ki trai jaka ba kynthup ia ka Kaida Nongbsap bad Deisimai Nongbsap.
Ha katei ka Dorkhas ia kaba la phah da ka KSU sha u ADC ka Ri Bhoi bad kaba la phah kopi ruh sha u Director General, Assam Rifle, Laitkor Shillong, la pynpaw ba kum ka seng hi ka pyrshah jur ia ka jingthmu jong katei ka tnat shipai ban shim shim jaka ha katei ka shnong, da kaba pynpaw ruh ia ki jingeh kaba la mad da ki nongshong shnong kiba don marjan bad ki ktem shipai, tang namar ka jingleh baheh bad pynibor da ki shipai kumba la mad da ki paidbah ha Laitkor, Umpling, Rangmen.