Pyrshah ka KSU, ba kiew palat ka bai kali

Shillong: Ka KSU Wapung Unit ha ka 12tark mynta u bnai, ha ka jingialam V. President ka Unit u samla Nidalut Siangshai bad u General Secretary, u samla Shwari Ryngkhlem, ki la leit ban ia kynduh ia u DTO, East Jaintia Hills, hadien ba ka AJTCVA ka lah pynmih ia dor bai kali kaba T.100, na Jowai-Wapung.

Haba ia nujor ia ka bai kali ha shwa ka khangdam(lockdown) kata ka long T.60 bad ym T.100 bad kane ka ktah ia ki nongleit nongwan. U DTO u la iathuh ba ia ka kali 5 seater ka long T.18 shi kilometer, haba peit pat ia ka jingjngai na Jowai sha Wapung ka long tang 21.8 kilometers bad ym iahap shuh bad ka dor ban siew haba khein ba kata ka T.18 shi kilometer ba lah pynmih hukum da ka sorkar.

Kumta ka KSU Wapung Unit ka kyrpad ba kim dei ban shim kabu ia ki nongleit nongwan haba ki shong kali bad bud ia ka hukum ka sorkar ban shim bai kali khnang ba kan nym ktah ia kiba duk kiba suk. Lada ka bai petrol/diesel ka kiew dor, hynrei ia ka bai kali pat kim dei ban pynkiew palat.