Pyrshah ka KHADC ban sieh MDC da kiwei ki jaidbynriew, ong U Chairman

Shillong: U Chairman ka Khasi Hills District Autonomous District Council (KHADC) u P.N Syiem mynta ka sngi u la ther tyngeh ia kito kiba ai jing mut sha ka Parliamentary Standing Committee (PSC) ban shu thung (nominate) MDC da kiwei pat ki jaidbynriew (Un-represented Tribe) hapoh ka KHADC.
“Ha ka jing shisha kiwei ki jaidbynriew riewlum ki ba la im ha ka jylla jong ngi ki la dei ban sngewnguh ba ki ioh ia ka hok kum ki riewlum (Tribal) ka jylla Megha laya, hynrei ban ong ba ki don ka hok ban synshar hapoh ka KHADC te kam shym ia hap satia” u la bynrap.
U P.N Syiem u la ong ruh ba kiwei pat ki riewlum kin nym lah ban sngewthuh ia ka jing dawa ban jing thrang ki trai muluk ka jylla lada ki ioh lad ban thaw ain hapoh ka KHADC. U la ong ruh ba ka KHADC ka pyrshah jur ia kane ka jing thmu ki riew shimet ban ai jing mut sha ka Parliamentary Standing Committee ban pynrung ia kiwei pat ki jaidbynriew (Un-represented Tribe) hapoh ka KHADC.
“Tang u Khasi u lah ban sngewthuh ia ka jing kwah ki paidbah hapoh ka KHADC bad kam don nongrim ba uwei pat u jaidbynriew ((Un-represented Tribe) un shynshar hapoh ka KHADC na ka bynta ka jing donkam u paid khamtam haba dei bad ka kam ban pynim ia ka kolshor u trai ri trai muluk” u la pynkut.