Pyrshah ka HYC Seng kmie ban plie ia ka khaii bad ka Bangladesh

Shillong: Ka HYC Sengkmie bad ka Riwar Mihngi People Forum, ka pynpaw ia ka jingpyrshah halor ka jingthmu ka sorkar ban plie noh ia ka Export Import ha ka 8 tarik mynta u bnai namar kam shai ka jingbatai ka sorkar na bynta kane ka khaii bad ka Ri Bangladesh.

Ha ka kyrwoh ba la phah da u Samla Edmund Khongngai uba dei u Dkhot ka CEC sengkmie bad ha ka juh udei u President ka HYC Riwar Circle u la ong ba ka seng ka pyrshah namar ka sorkar kam khot shwa ban ia kren ne ban pan jingmut na ki khlieh Nongshynshar Shnong kata ki Rangbah Shnong ki Sordar Raid ki Matabor bad ki Sirdar ka Elaka. “Kumno u Dy CM uba dei ruh u MLA ka thain riwar (Pynursla) u pynbna ban plie ia ka khaii border khlem da pyrkhat ia ki briew ka Constituency. Lada jia ba kine ki Driver Trok kin leit sha bangla bad hadien ba ka jingwanphai kin wanrah ia u jingpang COVID 19, dei ki paidbah na riwar ki ban ioh nyngkong ia kane jingpang” ong ka kyrwoh.

Ki jingkylli ba ka seng ka buh ha khmat ka sorkar.

1. Balei ka sorkar kam khot ia ki rangbah shnong ne sordar ban ia kren halor kane.
2. Ha ka por ba ka sorkar kan pynjari da ka Curfew ha ki thaiñ border kaba dang shu kut shen ha une u bnai jymmang ba la dep la wan da u Dy CM uba dei ruh u MLA jong ngi bad u pan jingmut na ki nongsynshar shnong. BALEI pat mynta um wan. Hato kam don eiei sha lyndet. Tang ban pyn hun ia ki heh spah bad ban myntoi kane ka sorkar khlem da pyrkhat ia ki paidbah kiba don ha kane ka thain border.
3. Hato ka sorkar kan pyllait katno tylli ki truck ha ka shi sngi.
4. Hadien ba kine ki driver kiba wan phai na bangladesh kin hap leh Quarantine ne em?
5. Hato ka don ne em ka lad jingiada na ka bynta ki paidbah jong ngi hangne ha border lada plie ia kane ka export import.
6. Balei ka sorkar kam plie noh ia ka iew ha pynursla kumjuh ka iew ha iewduh bad ha kiwei ki bynta ka ri khasi.
7. Kumba ngi tip ka ri Bangladesh ka dei ka ri kaba dng duna shibun khamtam ha ka jingsumar ia ka koit ka khia. Te kumno ka sorkar kam da pyrkhat bha lane bishar bin pabin shwa ban shim kat kane ka rai kaba ktah ia u paidbah.
8. Ngi iohi ba ka state jong ngi ka la kiew kiba ioh ia kane ka jingpang covid19 namar ka jingwan poi ki briew na kiwei ki jylla. Katno lei lada kine ki driver kin leit sha ri Bangladesh kaba ngim tip haduh katno kine ki briew ha bangladesh ki ioh ia u jingpang COVID 19.