Pyrshah ka HYC, ia ka projek bor ding ha Mawphu

Shillong, 20 Jylliew:
Ka HYC Umblai unit ka pyrshah jur ia NEEPCO ba thmu pyntrei ia ka project pynmih bording electric ka ba tip kyrteng kum ka Mawphu Hydroelectric project, namar ba ka NEEPCO ka iaid lait bad khlem ioh jingbit na ki paidnongshong shnong bad ka dorbar shnong baroh kawei. Kum ban shu pynkynmaw ka shnong Umblai ka ieng naduh wah Kongkhen shaduh Ri phlang naduh hyndai hynthai haduh kine ki sngi bad ka long ka jaka pdeng (centre) ia ka shnong Mawphu,Thieddieng bad Nongsteng. Ka seng ka lap ba ka shnong Umblai kam shym la shah kynthup ha ka Map jong ka Mawphu Hydroelectric project kum ka shnong ba shah ktah, ha kaba ma ka ka long kawei na ki shnong ba shah ktah kaba ym lah ban len ia ka jing shisha.
Na ka liang ka seng ka pynrem jur ia ka jing thmu jong ka NEEPCO ban pyntrei sop sop ia kane ka project khlem da kynjoh ktien bad ioh jingbit na ki paidnongshong shnong bad ka dorbar shnong Umblai hi baroh kawei bad ka seng ka pyrshah ruh ia kane ka project ban pyntrei khlem da ioh ka jing mynjur ryngkat ki paidnongshong shnong bad ka dorbar shnong Umblai pyllun, namar ka jing pyntrei ia kane ka project kan ktah ia ka wah Kongkhen kaba ka shnong ka juh sumar, kan ktah ruh ia ki bri ki bsah bad ki jaka rep jaka riang jong ki nongshong shnong.Namar hakane ka thain ki paidnongshong shnong ki im ja tang da ka rep ka riang ym don da kiwei pat ki jait kam bad ngi sngewthuh Wei ba la ktah ia ka rep ka riang ia ki bri ki bsah ngim don lad shuh da kumwei pat ban im.Ha kane ka thain ka Rep ka riang ka long kaba seisoh bha bad na kane ka thain ruh la pynmih ia u sohniamtra uba thiang bad ba pawnam ba la tip kum u sohniamtra Sohra.
Ka seng ka kyntu ia ki bor ba halor jong ka NEEPCO ba kin sahngeh shwa ban pyntrei ia kane ka project pynmih bording electric tad haduh ba ki paidnongshong shnong jong kane ka thain kin da ioh ia ka jingshai kaba tikna bad ruh ban ioh ia ka jing mynjur da ki ba bun balang jong ki para thain baroh kawei.
Ha ka juh ka por ka seng ka pynrem jur ia ka jing thmu jong ka sorkar jylla hapoh ka jingialam U Mukul Sangma ba u la tyrwa sbun mynsiem sha ka North Eastern Frontier Railway(NEFR) ban pyniasoh da lynti Rel na Shillong sha Sohra, namar ki iohi ia ka jing ioh thiah thai jong ka sorkar ba kam pat wanrah ia ki ain ki kanun ki ba pyrkhing ia ka jingrung jing mih ki bar jylla bad ki mynder ha ka Bri U Hynniewtrep.