Pyrshah ka HPF ia ka PPP ka Shillong Medical College

Shillong, 20 Iaiong:
Ka seng Hynniew trep People Federation (HPF) ka la pan jingtip da ka ain wad jingtip na ka sorkar halor ka jingpyn khreh ban tei ia ka Shillong Medical College da ka Public Private Partnership (PPP) kaba la thmu ban tei ha jaka ba don ha TB hospital ha Mawprem.
Ki nongialam ka seng kynthup u president u Bah Tyngshain Lapang ki la ong ba kim sngew iahap ia ka jingai pyniaid ia ka Shillong Medical College ha ka kompeni namar ba kane kan ktah ia ka lawei jong ki samla ha ka rung klas, bad kiwei ki jingioh bhah.
“Ngi kwah ba ka Shillong Medical College dei ban leh bad pyniaid hi ka sorkar jylla kumba leh ia ka Tura Medical College”, la ong u Bah Lapang haba kren hynne ka sngi sha ki nongthoh khubor ha Shillong Press Club.
Ka jingpynkhreh na ka bynta ban tei ia kine ki ar tylli ki jaka pule doktor ha ka jylla, ka la mareh shakhmat bad na ka bynta ka Shillong Medical College, ka sorkar ka la dep iasoi MoU (Memorandum of Understanding) bad ka kompeni KPF ba kan pyniaid.
    “Ngi la leit ban jurip ia ka jaka ban tei ia ka Shillong Medical College ha Mawprem, kam pat don dak eiei”, la iathuh u nongialam ka HPF.
    Ka sorkar ka dang pynkhreh ban rah noh ia ka TB Hospital sha Umsawli bad hadien ba la pynkynriah, kan sa sdang noh ia ka kam ban tei ia ka Shillong Medical College ha katei ka jaka.
    Ha ka jingpan jingtip, ka seng ka la  kwah ban tip katno la mang pisa ban tei ia kane ka College, lano ban pyndep, kaei ka kompeni kaban pyniaid, mynno la iasoi ia ka MoU, katno ngut ki nongpang kan pdiang, katno ngut kan pdiang ban pule doktor, katno tylli ki jaka pule yn buh bhah kyrpang ia ki samla ka jylla, la sdang ne em  ka jingtrei, katno la dep pynlait pisa sha ka kompeni.