Pyrshah ka HNLC, ïa ka jingthmu ban khangdam ïa ka MCCL

Shillong:Ka seng Hynñiew trep National Liberation Council (HNLC) ha ka sngi Thohdieng, ka la pyrshah ïa ka jingthmu jong ka Sorkar Jylla ban khangdam noh ïa ka Mawmluh Cherra Cement Limited (MCCL) haba dawa ïa u MLA ka NPP na Sohra Bah Gavin M Mylliemngap ban shim ïa ka jingkitkhlieh da kaba iehnohkam kum u MLA ka thaiñ.

Ha kajuh ka por, ka HNLC ka la tyrwa ban ai jingïarap ïa ki nongtrei ka MCCL da kaba siew ïa ka tulop ba manla u bnai, kaba long haduh T. 25,000 lada ki ïasnohkti lang ha ka jingïaleh jong ka seng.
Kane ka jingkynthoh ka HNLC ka la wan ruh ha ka por ba ka jingïakren ïasuk hapdeng ka Sorkar Pdeng, ka Sorkar Jylla bad ka HNLC ka dang ïaid shakhmat.
“Lada ka Sorkar ka jam shakhmat bad ka jingkhangdam ïa ka MCCL, kan bha shibun ïa u MLA ka Sohra Gavin ban shim ïa ka jingbahkhlieh. Ha ka jingshisha, u dei ban iehnoh ïa ka kam kum u MLA,” ong u General Secretary cum Publicity Secretary ka HNLC Bah Saiñkupar Nongtraw ha ka kyrwoh.

Ula maham ruh, “Lada u (Gavin) kyntait ban hiar shuki, ka HNLC kan pynbahkhlieh ha u. Kumba ma phi bad ka Sorkar jong phi ki nud ban tep im ïa ka MCCL, ngi tynrong ïa ka jingbahkhlieh ha phi da ki kam ba phi la leh”.
Une u nongïalam ka HNLC ula ong ruh, “Ïa mynta, ngim ïohi satia ban don kano kano ka lad kaba biang. Kumta, ka HNLC ka kwah ban buh ïa ka jingtyrwa sha ki nongtrei jong ka karkhana: lada phi kloi ban ïasnohkti bad ki jingïaleh jong ngi, ngin ai ïa ki da ka tulop ba man u bnai kaba long T. 25,000. Kiba lah ban ïasnohkti ki dei ban long hapoh 45 snem ka rta bad kin hap ban leit hikai pyntbit kum ki shipai. Lada ki pyni ïa ka jingkut jingmut ban ïakit lem ïa ka jingïalehkai jong ngi, ngi lah ban mynjur ha kaban tyrwa ïa ka tulop kaba kham biang”.

Nalor kane, u Bah Saiñkupar ula ong ba ka jingbyrngem jong ka Sorkar Jylla ban khangdam noh shisyndon ïa ka MCCL ka dei tang ka buit ban pynkylla ïa ka lynti na ka bynta kiwei pat ki kam.
“Ka HNLC ka pynrem jur ïa kane ka jingthmu ba sniew jong ka Sorkar naba kan ieh khlem kam ïa ki nongshong shnong ka Sohra bad ieh ïa ki ha ka jingshimkabu ki khwai myntoi. Ha ka jaka ban kheiñ kongsan ïa ka jingpynjanai ïa ka MCCL, ka jingthmu ka Sorkar ka long ban khangdam noh bad ka ïaleh ban kyntiew pynban ïa ka roi ka par ki karkhana dewbilat ba long trai da ki bar jylla na kiwei ki Jylla,” ula ong.