Pyrshah ka FKJGP ia ka jingkwah ktien ‘Pnar’ ka JSU

Shillong, 6 Naitung:
Hadien ba ka Jaintia Student Union (JSU) ka la leit dawa na ka JHADC ban ioh la ki jong ki dak thoh dak pule ha ka ktien Pnar, mynta pat ka Federation of Khasi Jaintia and Garo People (FKJGP) War Jaintia ka la pyrshah jur ia katei ka jingdawa jong ka JSU bad ka la ong ba katei ka long kumba phah arliang ia ka jaitbynriew kaba tang shi troh.
U Vice President jong ka FKJGP-War Jaintia Circle u bah Shlur Mukhim u la iathuh ba ki briew kiba sah ha War Jaintia ki kren beit da ka ktien War la ha ing hasem ne ha lynti syngkien hynrei haba ki leit sha jowai ki kren da ka ktien Pnar hynrei ban ia ktien Pnar ki dang kham sngewthuh pat ia ka ktien Khasi la ha ka jingthoh ha ki kot ,ha skul ne ha ingmane.
“Nga kum u Vice-President ngam sngewiahap daleilei ruh em ia ka jingdawa ka JSU ban don la ki dak thoh ha ka ktien Pnar namar haduh mynta ngi thoh ngi pule da ka ktien Khasi bad aiu kan jia lada baroh ki tnad jong ka jaidbynriew kum ia u Khynriam, u Pnar,u Bhoi,u Maram,u Lyngngam, u War ba kin don noh la ki jong ki dak thoh, satang katno ngi la jah rngai noh na kane ka pyrthei” u la ong.U la ong ruh ba ba ki War Jaintia ruh ki dei hi ki Pnar, tangba ki kren da ka ktien lajong katba ki Pnar na Jowai kim nang ban kren ktien War Jaintia kane ka la pynlong ia ki briew na ki thain War ban shim beit ia ka ktien Khasi kum ka ktien pdeng.