Pyrshah ka FKJGP, halor ka jingthmu seng ïew ki Nepali ha Langpih

Nongstoiñ: Ka Seng FKJGP Langpih Area Unit ka pyrshah jur halor ka jingthmu seng Iew jong ki Nepali ha ka shnong Langpih, ha lad Mawdiangsnam kaba don ha syndah ka jaka shong ki Pulit Assam ha ka jaka ba long trai da u Bah Hesdingstar Sanglein na ka Shnong Langpih.

Katkum ka kyrwoh khubor ba la phah da u Serbilin Lyngdoh President FKJGP Langpih Area Unit la ong ba katkum ka jingtip ba la ioh lum da ka Seng kala don ka jingpyrshah ban trei ban shna ia ka ïing dara ban pynlong Iew hangtei, hynrei hadien ba na ka liang u trai khyndew ula ujor sha ki Pulit ka Meghalaya Out Post bad ki la leit inquiry bad la lap ba ki Nepali ki la sdang pynieng ïing dara ha katei ka jaka, hynrei ki Pulit ki la phah pynsangeh noh ban trei ha katei ka jaka, ha kaba ki Nepali ki la pan por ruh na ki Pulit Meghalaya ba kin sa wanrah ia ki kot ki sla halor katei ka jaka hapoh 3 sngi.
Shuh shuh la ong ba ka Seng ka kyrpad ia ka Sorkar Meghalaya ban shim jingkit khlieh halor katei ka jingleh donbor jong ki Nepali, khnang ba kan don ka shong suk shong sain, bad ka kyntu ruh ia ki bor Hima, Dorbar Shnong, ki Seng Samla, ki Seng Longkmie ban khanglad bad pyrshah ia katei ka jingthmu jong ki Nepali ban seng ia katei ka Iew.