Nongpoh: Ka FKJGP Sohkhwai Umdu Unit, ka la pynpaw ka jingpyrshah halor ka jingthmu ka Ri Bhoi Tourism & Environmental Development Forum (RBTEDF) ban pynlong ka jingiakop khwai hapoh ka wah Umtrew kaba don ha Lailad.
U samla Banroy Wahlang, president ka FKJGP, Sohkhwai Umdu Unit, u la ong ba ka nongrim kaba la pynlong ia ka seng ba kan pyrshah halor katei ka jingthmu ka RBTEDF, ka dei namar ba katei ka Forum kam don bynta ei ei ha ka ban pynneh pynsah ia ki doh um doh wah kiba im hapoh katei ka wah.
Shuh shuh, u la ong ruh ba ki dohkha kiba don hapoh katei wah, ki dei ki dohkha kiba la don lypa bad kiba la im bad roi ha katei ka Wah, hynrei kumba long mynta ka RBTEDF ka thmu ruh ban pynlong ia katei ka jingiakop, da kaba shim bai khwai haduh T.500 shi ryngwiang, ka la kylla long pynban kum ka lad kamai pisa khlem da pyrkhat ia ka jinglut ki dohkha hapoh katei ka wah bad dei na kata ka daw kaba la pynlong ia ka seng ba kan pyrshah beit.
Lah ruh ban kdew hangne, ba na ka liang ka RBTEDF, ka la ong ba ka jingthmu jong ki ban pynlong ia katei ka jingiakop khaw ha ka 9 tarik mynta u bnai, ka long kum shibynta ban pynsngewthuh paidbah halor ka jingkordor ha kaba iadei bad ka jingpynneh pynsah ia ki dohum dohwah kiba don hapoh jong katei ka Wah, kaba dei ruh kawei na ki Wah don nam ha Ri Bhoi.
Phi don ban ong eiei?