Jowai: Ka Dorbar shnong Lumshnong ha ka jingiadei bad ka jing pynbna paidbah, kaba la pynmih lyngba ka office jong u member secretary jong ka Meghalaya Polution Control Board (MPCB) Shillong kaba la mih ha ka tarik 15-02-2019 na ka bynta ba ka M/S Star Cement kan pynheh ia ka jingtih par mawshun jongka na ka 09 lakh tons sha ka 25 lakh ton shi snem, ka ban sa pynlong ha ka 19tarik Lber 2019.
Na ka liang ka Dorbar Shnong ka pynrem jur iakane ka jingleh don bor bad iuhroit ia ka hok jong ka shnong bad ia ka riti synshar jong ka shnong ka thaw ia ka ba la pynkup bor da ka JHADC lyngba ka 06th schedule ia kaba la pynkup bor ia ki Rangbah Shnong ban peit ia ka shnong. La ong shuh shuh ba ka pynsngewsih pat ia ka dorbar shnong lyngba ka office jong u Deputy Commissioner East Jaintia Hills District ryngkat ka office jong u Member Secretary Meghalaya Polution Control Board (MPCB) Shillong ba kim shym la pynmih khubor kumba ki la kular ban ban pynsangeh ne pynpep noh ia ka public hearing wat hadien ba la dep ai daka jingthoh ban pynpep.
Ki daw ba pynpep ia kane ka jing ialang, ka long ba ka shnong kan sa shah ktah bad kan pynduh ia ki tyllong um ba don ha sawdong ka shnong, kan buh jingma ia ki iing ki briew ban orpait namar ka company ka pyndonkam da ki tiar pynbthei haba khlong mawshun kumba jia ha kine ki snem ba la dep, kan ktah ruh ia ka rep ka riang, khamtam eh kan ktah jur ia ka jingkoit jingkhiah.
La ong ruh ba ka dorbar shnong ka ieng pyrshah tad haduh ban ioh jingbit na ka shnong. Kaba pynlyngoh pat ia ka Dorbar shnong ba kat kum ka jingpyntip ba ioh na u DC east Jaintia Hills Dist lyngba ka jingkren phone, ba ia ka jingialang, yn pynlong beit ha ka tarik kaba la kdew, lyngba ka hukum, kaba la ioh na u DC ba u CM Conrad Sangma u la hukum ia u (DC) ba ia ka jingialang, yn pynlong beit ha ka tarik ba la dep ai.
Halor kane ka nongrim, ka Dorbar shnong Lumshnong ka pynrem jur ia kane ka jingleh donbor jong ki bor ba dei peit iakane ka kam. Ka dorbar shnong Lumshnong ka pyrshah bad maham jur ban pynlong ia ka jingialang, khlem da ioh jingbit bad iateh kyndon shwa bad ka Shnong bad lada jia ba mih kino kino ki jingjia ba sngewsih haba pynlong ia katei ka jingialang, ki bor sorkar ba dei peit kin shim ia ka jingkit khlieh.
Phi don ban ong eiei?