Nongpoh:Ka Confederation of Ri Bhoi People (CoRP), kum kawei na ki kynhun sengbhalang ha Ri Bhoi, mynta ka sngi ka la mih shakhmat na bynta ban pynpaw ia ka jingpyrshah kaba jur eh halor ka jingthied jaka ka Meghalaya Industrial Development Corporation (MIDC) ha ka shnong Umsiang, kaba dei kawei na ki shnong ha Ri Bhoi bad kaba don ha khappud ka jylla Meghalaya bad ka Assam.
Haba iadei bad katei ka jingpyrshah thied jaka, u Bah Pateng Marsing, Working president ka CoRP, u la ongba ka seng ka pyrshah jur ia kane ka jingthied jaka ka MIDC ia ka jaka kaba la kot 300 Akar bad ha ka dor kaba la poi sha ka T. 100 klur.
Shuh shuh, utei u nongialam ka CoRP, u la ong ruh ba ka seng ka la mih shakhat ban pyrshah halor katei ka jingthmu thied jaka ka MIDC, ka dei hadien ba ka la ioh jingtip, ba ia kane ka jingthied jaka ka MIDC la shu leh sop sop tang da ki rangbah shnong bad u Syiem kiba la ai sop sop ia ka NOC khlem da pyntip sha u paidbah.
Kumba kaba long mynta ba ka jingdon ki Karkhana ha Byrnihat bad Umiam, kam ju ai jingmyntoi ia ki trai muluk ki trai jaka, ha kaba ka jingmyntoi kaba bun, la ioh da ki bar jylla bad nalorkata ka wanrah ia ka jingjaboh ka lyer bad kaei kaba ki padibah ki mat ka dei ka jingma ia ka koit ka khiah kumba la ioh nam ba ka Byrnihat ka la ioh ia ka nam ba jaboh tam ha ka pyrthei” ong u Bah Pateng Marsing.
Kumta na ka liang ka seng, ka dawa na ka sorkar jylla ba ka dei ban sangeh noh martyr halor katei ka jingthmu jingthied jaka ka MIDC sha ka thain Umsiang bad lada ka sorkar kam sngap ka seng kam banse ban mih bad ban iakhih paidbah.
Namarkata, haba iadei bad katei ka jingthmu thied jaka ka MIDC ha Umsiang, ka seng ka la dep ruh ba ujor da ka RTI sha ka ophis ka MIDC halor kane ka kam thied jaka bad hadien ba la ioh ia ka jubab ka seng kan sa pynshai sha ki paidbah bad kan ieng pyrshah ruh ban nym ailad ban thied jaka da ka MIDC ban pynlong kum kata ka jaka ki Karkhana kaba ki trai jylla kim ioh jingmyntoi bad ka jingmyntoi ka leit tang sha ki bar jylla, u la bynrap.
Phi don ban ong eiei?