Pyrshah ka AJCCTA halor ka rai ban plie ia ki WB bad Toll gate

Jowai:Ka All Jaintia Cement and Clinker Transporter’s Association (AJCCTA) ka la pynpaw ia ka jingsngew pyrshah jur ka jong ka halor ka rai jong ka sorkar ban plie noh ia ki jaka thew jaka woh (Weighbridges bad ki jaka khrong toll gate ha ka jylla.

“Kane ka rai jong ka sorkar kan buh ia ki trai shnong ka jylla hapdeng ka jingma lyngba ki trok driver kiba wan iaid lyngba bad kiba hap ban siew ia ka dor ba la buh ha kitei ki weighbridge bad Toll gate”, la ong u ma Balen Thubru, President ka AJCCTA ha u kyrwoh khubor.

Ka AJCCTA ka la pynpaw ba kam lah ban sngewthuh ba balei ka sorkar ka rai ban plie iaki wat ka tip bha ba bun ki kali kin iaid na kawei ka jylla sha kawei pat khamtam kito ki driver kiba kit ia ki marbam na Assam sha Assam, Mizoram bad Tripura
“Ki trok draibar lane ki handyman jong ki, ki hap ban siew ia ka pisa ha ki toll gate lane weighbridge bad u Khniang Corona u lah ban saphriang lyngba kitei ki driver lyngba ka ia shim bad ia kylliang pisa”, la ong u ma Balen.
U ma Balen u la ong shuh shuh ba katkum ka jingbatai, la sngewthuh ba utei u Khniang u lah ban saphriang lyngba ki phngit um lane Droplets haba jyrhoh, synriah bad kumta terter. Lada ki driver kiba bat ia ka pisa kidei kiba don ia u Kjniang jingpang khlempep ki Droplets kilah ban bit ha ka pisa ruh.
Kumta halor kane, ka jingma ia ki paidbah, ka AJCCTA ka la dawa ban khang khyrdep shwa ia kine ki Weighbridge bad ki Toll gate kiba don sha shi lynter u surok bah hapoh ka jylla.