Shillong: U MLA ka Jirang u bah Sosthenes Sohtun u la pynpaw ia ka jingpyrshah jur ia ka jingthmu die jaka sha ki shipai Assam Rifle ha ka thain Umtyrnga, kaba hap ha Jirang konstitwensi ka ri-Bhoi.
Haba kren myn hynnin ka sngi, u bah Sosthenes u la ong ba kum u nongmihkhmat paidbah u la ieng na ka bynta ki paidbah babun balang bad u pyrshah ia kane ka jingthmu ban die jaka.
“Nga pyrshah ia kane ka jingthmu ban die jaka kumba 13 km sq kaba ym duna ia ka 7 hajar akar”, la ong u bah Sosthenes.
U la iathuh ba mar mar, hadien ba la ioh jingtip ia kane, u la thoh sha ka bor synshar district, sha u Syiem ka Hima Mylliem bad ka KHADC ba ki dei ban tuklar ia kane ka jingthmu ban die jaka sha ki shipai.
“Nga pyrshah jur ia kane ban die sha ki shipai khlem ka jingmynjur ki paidbah”, u la ong.
Ha ka jingthoh sha u Syiem ka Hima Myllie, u MLA ka Jirang u la ong ba u la ioh jingtip ba ka don na ki riew shim kabu ha ki thain kaba kynthup ia ka shnong Umlathu, Umsen, Nepali Basti, Nagrabil, Pillungku A&B, Lalmati, Jyrmang, bad kiwei ki shnong kila die kulmar ia ka jaka jong kiwei ki trai sha u Deilang Shirup khlem ka jingtip jong ki trai jaka ba markhap bad kane ka jingle riewkhlaw jong kine ki briew ka la wanrah ka jingkulmar jingmut bad ka la pynbitat ia ki trai jaka bad ia ka shnong baroh kawei bad khlem artatien kan ktah ruh ia ka jaka rep jaka riang jong ki trai shnong.
“Lada ngim shim khia ia kane, khlem pep kan wanrah jingeh, jingma ia kiwei pat ki shnong kiba don hapoh Ri-Bhoi bad khamtam eh ia kito ki shnong kiba hap hapoh ka Jirang konstiwensi”, la ong u bah Sosthenes.
U la bynrap ruh ba u la pyrshah jur ia kane bad dei ban pynsangeh shi syndon ia kane bad wat ailad ia ki riew shim kabu ban rejister ha ka ophis jong u Syiem bad dei ban phah jurip bha ia u pud u sam jong ki jaka bad ban pynshitom ia ki riew shim kabu katkum ka ain.
Lah ban kdew ba kham mynshwa, ki paidbah bad ki rangbah shnong na katei ka thain, ki la wan tur smam sha ka ophis u Syiem Mylliem ban pyrshah jur ia kane ka jingthmu die jaka sha ki shipai Assam Rifles.