Pyrshah jur u kyrtong RDA, ban pynkylla tang kawei ka niam ha ka Ri

Shillong: Ki paidbah ka Sohiong konstitwensi, ki la iatuid ha ka jingialang jong ka synjuk Regional Democratic Alliance RDA kaba long ha Sohiong ha ka sngi Saitjain.

Ha kane ka sngi, nalor u kyrtong ka RDA u bah Robertjune Kharjahrin, la don lang u President ka UDP bah Metbah Lyngdoh, u MLA ka Sohiong bah Synshar Kupar Lyngdoh, u General Secretary ka HSPDP bah Panbor Ryntathiang bad kiwei ki nongialam jong ka UDP bad ka HSPDP.

Haba kren ha ka jingialang, u bah Robertjune ula ong ba ka donkam ban iasaid ha Parliament ban ioh ia ki lad jingiada ia ka jaitbynriew na ka jingwan kyrthep kiwei, kumjuh ban pynkhlain ia ki district council kiba peit ia ka khyndew ka shyiap, ka riti dustur.
U bah Robertjune ula ong ba ka donkam ban pynkut noh ia ka jingiakajia pud hapdeng ka Assam bad ka Meghalaya, kaba la sahteng bun phew snem.

Ula ong ruh ba dei ban iasaid tyngeh pyrshah ia ka jingthmu ban pynkylla kawei ka niam kawei ka ri bad kawei ka ktien ha ka ri, bad ban ieng pyrshah ia ka jingthmu ban pynduh noh ia ka jingpynduh ia ka jinglaitluid ban mane ia u Blei katkum ka jingngeit.
“Ngan iasaid ruh ban dawa pynrung ia ki niam Khasi Niam Tre kum ki Minority status khnang ba kin ioh jingmyntoi kumba long lem kiwei”, la ong bah Robertjune.

Ha kajuh ka por, ula kyntu ba ki paidbah kim dei ban jied nongmihkhmat da ka jingsngew shongshit hynrei dei ban khan pyrkhat bha.