Pyrshah jur ki riew rangbah bad dkhot ka EC Umiam ban pyrshah halor ka jingleh donbor u Rangbah Shnong

Nongpoh: Ki riew rangbah lem bad ki dkhot ka Executive Committee ka Dorbar Shnong Umiam, ki la iamih paidbah na ka bynta ban pynpaw ia ka jingpyrshah halor ki kam leh donbor da u Bah Twinkle Buhphang, uba dei u Rangbah shnong ka shnong Umiam.

Lyngba katei ka jingialang, kitei ki riew rangbah bad ki dkhot ka Executive Member ka shnong Umiam, ki la shim ia ka rai ban dawa na ka Ophis u Syiem ka Hima Mylliem bad Raid Mawbuh Syiemship ba ki dei ban shimkhia bad ban pynbeit noh ia katei ka kam hapoh 2 Taiew, lym kumta ki riew rangbah lem bad ki paidbah jong katei ka shnong kin sa iaid la ka jong la lynti bad ban leh ia kaba donkam baroh.

Haba kren sha ki lad pathaikhubor, u Bah Samuel Marwein, Secretary ka shnong Umiam, u la ong ba ka nongrim kaba la pynlong ia ki riew rangbah bad ki dkhot ka Executive Committee ka Dorbar shnong Umiam, ba kin iamih paidbah, ka dei halor ki nongrim ba u Bah Twinkle Buhphang, u la trei marwei bad khlem da burom shuh ia ki paidbah ka shnong bad ruh ia ki dkhot ka Executive Committee.

U la ong ruh ba ki paidbah ka shnong, kim lah shuh ban sngap halor ki kam leh marwei da u Bah Twinkle Buhphang, namar u la leh shibun ki kam sop sop naduh ki kam ai NOC pathar sha ki bar jylla, ka jingpyndonkam bakla ia ka Letter Head ka shnong ha kiba bun ki liang, kaba ki paidbah ka shnong hi kim sngewiahap ia ka jingleh jong u.

Namarkata, na ka bynta ban pynbeit ia kitei ki kynrum kynram hapoh ka shnong Umiam, kitei ki riew rangbah lem bad ki dkhot ka Executive Committee, ki la shim ia ka rai ban dawa bad aipor 2 taiedw na ka Hima Mylliem bad ia u Syiem ka Raid Mawbuh ba ki dei ban lum Dorbar bad ban pynbeit noh ia kitei ki huri hura hapoh katei ka shnong, namar kum ki paidbah kim lah shuh ban shah ia kitei ki kam leh marwei da u Bah Twinkle Buhphang, uba dei u rangbah shnong ka Umiam.