Pyrshah jur ka KSU, ia ka jingthmu ka Raid Marwet ban die jaka sha ki BSF

Shillong:Ka Khasi Students’Union, Central Executive Council lyngba kane ka kyrwoh ka pynpaw ia ka jingpyrshah kaba jur halor ka jingthmu ka Raid Marwet bad ka Hima Mylliem ban die ia ka jaka ha Lakhra-Beltola sha ki shipai Border Security Force. Katkum ki jingtip ba la ioh lum da ka seng, ka jaka kaba hap ha Lakhra kaba heh haduh 1000 hectare la thmu ban lilam noh sha ki shipai BSF da ka Hima Mylliem bad ka Raid Marwet ha ka dor kumba 1000 klur tyngka. Kaba kham sngewphylla ka long ba kane ka jaka ba kine ki hima ki mut ban die sha ki BSF lyngba uwei u agent uba na ka kur Law ka dei ka jaka kaba hap hapoh ka Hima Sohiong. Kumta ka seng ka maham tyngeh ia ki khwan myntoi shimet ba kim dei ban lilam ia ka jaka u khun Khasi Khara sha kiwei ki briew khamtam ia ki shipai namar kumba la sakhi mynta ba bun bah ki jaka ha Bri U Hynñiewtrep la kurup lut da ki bor shipai. Kyntang ia wai ka seng halor kane ka kam kan sa leit ia kynduh ia ki bor ha KHADC ban dawa ban khanglad ia kane ka jingthmu kaba sniew bad dawa ruh ba ka Council ka dei ban pynshitom ia kino kino kiba donkti ha kane ka jingthmu ban lilam ia ka jaka kaba heh kumba mar shiteng bad ka sor Shillong sha ki shipai, ong ka kyrwoh na U bah Donald V Thabah, General Secretary.