Pyrshah jur ka KSU, halor ka jingthmu tei khyrdop ki shipai ha 4-Kilo

Nongpoh: Haba pynpaw ia ka jingpyrshah kaba jur halor ka jingthmu ki shipai ka Umroi Military Station ban tei khyrdop ha shnong 4-Kilo, ka shnong kaba don harud ka surok Shillong By-Pass hajan Umiam, mynta ka sngi ki nongialam ka KSU Eastern Border Area bad Umiam Circle, ki la phah da ka dorkhas sha ka DC Ri Bhoi, na ka bynta ban kyntu ia ka ba ka dei ban tuklar lem bad ban iakren ia kitei ki Shipai ba ki dei ban sangeh noh ia katei ka jingthmu tei Khyrdop ha katei ka jaka.

Ha ka jingshisha, kitei ki nongialam ka KSU kaba kynthup ia u Samla Banjop Maring, President ka KSU, EBA bad u samla Steven Kharkrang, President ka Umiam Circle lem bad kiwei pat ki dkhot, ki la thmu ban leit kynduh ia ka Kong RM Kurbah, DC ka Ri Bhoi, hynrei namar ka jingbymdon, ki la leit ban kynduh ia u Bah DP Kharsati, ADC ka Ri Bhoi, ha kaba ki la ioh ban pynsngew lut ia baroh ki nongrim, kiba la pynlong ia ka seng ba kan pyrshah jur halor katei ka jingthmu tei khyrdop ki Shipai.
Ha ka dorkhas kaba ki la phah sha ka DC Ri Bhoi, kitei ki nongialam ka KSU, ki la pynpaw ba katei ka jaka kaba la thmu tei Khyrdop da ki shipai, ka dei ka lynti iaid kjat ki paidbah, namar haneng jong katei ka jaka, ka don ka Iingmane bad Iing skul, ha kajuh ruh ka por katei ka jaka ka dei ruh ka jaka jong ki riew paidbah ha baroh arliang.
Nalor kata, kitei ki nongialam ka KSU, ki la pynpaw ruh ba kham shadien jong katei ka jaka, kaba la thmu tei Khyrdop ki shipai, ka don ruh ka surok PWD, kaba la pyniasoh na katei ka shnong bad mih sha Umiam.
Shuh shuh, ki pynpaw ruh ba katei ka tnat Shipai, ka la dep ban buh ia kawei ka Khyrdop ne ka (Check Gate) bad kaba don ia ka jingjngai kaba tang 1km ei ei shadien na katei ka jaka, kaba ki la thmu ban tei thymmai mynta.
Ka KSU, ka la pynpaw ba ka nongrim kaba hakhmat eh kaba la pynlong ia ka KSU, ba kan pyrshah halor katei ka jingthmu tei Khyrdop ki shipai, ka dei hadien ba ki la iai iohi ia ka jingpynibor da ki shipai pyrshah ia ki nongleit nongwan, kumba ka la iai jia ha manla ki jaka ba don ki shipai bad kaba la ktah shisha ia ka shongsuk shongsain ki paidbah nongshong shnong.
Halor kitei ki nongrim, na ka liang ka KSU, ka la kyrpad ia ka DC Ri Bhoi ba ka dei ban shimkhia bad ban pynsangeh noh mardor halor katei ka jingthmu tei khyrdop ha katei ka jaka, namar kum ka seng lem bad ki paidbah nongshong shnong ha katei ka thain, ki pyrshah jur halor katei ka jingthmu tei khyrdop ki shipai ha katei ka jaka.