Pyrshah jur ka JTOA ba shah kit dewiong 19 ton ia ki 12 taiar

Shillong,31K’lyngkot:
Ka Jaintia Truck Owner Association , ka la pynpaw ba ka pyrshah jur ia ka jingai bor u Director ka Mineral Resources ia ki trok 12 taiar ban kit dewiong haduh 19 ton, bad katei ka seng ka la ong ba ka la phah da ka jingthoh sha u Director ka Mineral Resources ban sangeh shisyndon ia katei ka jingpyllait hukum jong ki. Haba ia kren bad u Rupang u General Secretary katei ka Association u Bah Inrico Passi, u la ong ba ka seng ka pyrshah jur namar ba katei ka jingaia bor ia ki trok 12 taiar ka dei tang ka jingnion bein bad ka jingpynduh kamai ia ki briew jong kane ka jylla ( Khasi&Jaintia) hynrei ka dei ka jingpynkiew kamai ia ki bar jylla. ‘Katei ka jingailad ia ki trok 12 taiar ka pynduh kamai ia ki local , ka dei tang ka jingmyntoi ki briew kiba na bar’ ong u Bah Passih.
‘Mano na ki local jong ngi kiba pyndonkam bad kiba don ia kita ki trok 12 taiar- haba bun na ngi ki dei kiba don tang kito hi ki trok kumba la iohi ba ki iaid’ ong biang u Bah Passih uba la kdew shai ba katei ka jingailad ka tnad Mineral Resources ka dei tang ka jingthmu ban pynduh kamai ia ki trai jylla. U Bah passih u la iathuh ruh ba ia kitei ki trok 12 taiar la pyndonkam tang ki kompeni ban a-bara kum ha ki karkhana pynmih dewbilat sha lum shnong ki pyndonkam ban pynkit ia ki dew bilat jong ki sha bar jylla da kitei ki trok.
Ban pynpaw ia ka jingpyrshah jur jong ki ia ka jingshim rai ka tnad Mineral Resources ban ailad ia ki 12 taiar, u Bah Passih u la ong ba ka Association kan pynlong ia ka jingialang ba kyrkieh jong ka ha ka 3 tarik u rymphang ha ka por 1 baje mynsngi ha 7-mer, ha kaba ha ka tei ka jingialang yn ia kren da kino ki lada ban pynbor ia katei ka tnad ba kan pynsangeh noh ia katei ka hukum.