Pyrshah jur ka AJCTA ia ka khyrdop lum pisa bad MVI ka Jowai

Jowai: Ka All Jaintia Cement Transporters’ Association (AJCTA) ka la pynpaw ia ka jingpyrshah jur jong ka halor ka jingbuh ia ka Tollgate ha Ialong da ka NHAI bad halor kane, na ka liang katei ka seng ka la dep ruh ban phah ia ka jingujor jong ka sha u Project Director, PIU, Shillong, NHAI kaba don ha Lachumiere, Shillong.
U President ka Seng, u bah Balen Thubru u la ong ba katei ka jingdon jong katei ka khyrdop, lane ka Toll Plaza ka long kaba be-ain katkum ki kyndon jong ka NHAI.
Ki kyndon ka NHAI ka la kren shai ba ka Toll Plaza kam lah ban don hapoh shi Kilometer marjan bad ka Petrol Pump bad ka Weighbridge kumjuh ruh ki Petrol Pump lane ka Weighbridge kam lah ban don hapoh 1000m (1KM) na ka Toll Plaza, hynrei kane ka Toll Plaza ka don hajan eh ka petrol pump kaba jngai tang kumba 500m eiei bad kumba 750m eiei na ka Weighbridge kaba don ha 7th Mile, West Jaintia Hills.
Na ka liang ka AJCTA ka la kyntu ia ka NHAI ba kan kynriah ia katei ka toll Plaza khnang ba kan nym long kaba be-ain bad kaba pynkhein ia ki kyndon kiba la dep ban buh ha ka kyndon 4.7 jong ka Guidelines bad Norms jong ka NHAI.
Na ka liang ka AJCTA ka la maham ruh ban leit kiew iinglieh iingsaw lada ka NHAI kam pathiaw satia ia ki jingujor ba la dep ujor pyrshah halor ka jingbuh be-ain ia katei ka Toll Plaza ha 7th Mile, Ialong, West Jaintia Hills.
Ha kajuh ka por, ka seng ka la ujor pyrshah ruh ia uwei u MVI (Motor Vehicle Inspector ka West Jaintia Hills u bym ju wan poi tikna satia sha ophis.
Ka seng ka la pynpaw ba ka jingbym wan tikna jong utei u MVI sha ophis, ka la buh ia ki paidbah kiba don kali ha ka jingeh kaba khraw.
“Ngi la shu shah dain kuna tang namar ba ka ophis ka la hap ban dain kuna iangi ba ngi slem ban pyndep ia ki jingsiew kaba iadei bad ka Transport Department bad ka daw hi ka long namar ba utei u MVI um ju wan poi bad um ju don satia hapoh Office jong u”, la ong u kyrwoh na ka seng.
Na ka liang ka Seng ka la kyntu ia ki bor bahalor ban ai jingsneng da kaba tyngeh ia utei u MVI uba ka seng kam shym la kwah ban pynpaw kyrteng.