Shillong 31 K’Lyngkot: U khun shynrang jong u bah HDR kata u bah Nathaniel Rymmai u ba long u kyrtong ban ia aireng ha kane ilekshon MDC na Sohïong Konstitwensi na ka seng Congress ha ka sngi thohdieng ka 31 tarik Kyllalyngkot 2025, u la leit ban thep kyrteng ialade hakhmat u Returning Officer u bah PT. Pasah ha DC ophis, Shillong, kata shwa ba un pyntikna ialade kum u kyrtong ba pura ban aireng ha ka ilekshon MDC sha District Council.
Ia u bah Nathaniel Rymmai la wan ban synranlang da ki bahaiing hasem haryngkat ruh bad ki nongkyrshan.
U bah Nathaniel Rymmai haba kren sha ki lad pathai khubor ula ong, ba ka daw ba pynlong ia u ban ieng iakhun ha kane ka ilekshon ba mynta kadei namar ka jingieid jong ki paidbah ia ipa ka ba nga hap ban siew kylliang da kaba bha nakabynta jongki, ha ka ba ki nongkyrshan baroh ki phaikhmat beit sha ka iing iPa bad kum u khun shynrang nga hap ban mih ban buddien ia ki matti jongi.
Haba kylli pat kaei kadaw ba pynlong ia u ban ieng iakhun na ka seng Congress u bah Nathaniel u la ong, ba naduh mynshwa nga la heh lasan bad ka seng Congress bad katkum ka jingangnud jong iPa kam shem la urlong, kumta ka seng Congress ka ba long beit naduh tynrai ka ba skhem bad ruh ki lok ki jor ki ai mynsiem ban iakhun beit na ka seng Congress.
Ha ba iadei bad ka jingiakhun jong u ha kane ka ilekshon MDC ba mynta ka ba long pyrshah ia u MLA ba mynta u bah Synshar Lyngdoh u ba dangdei shi bahaiing ha kajuh kapor ruh u ba dei u khun pyrsa trai jong bah HDR, nakaliang u bah Nathaniel u la pynpaw ba ka kam iing hi kadei beit ka kam iing bad ka politik ka dei beit ka politik, nalor kata u la ong ruh, ba nga mih shakhmat ban ia aireng ha kane ka ilekshon kadei na ka jingkyntu kynpham ki paralok ki ba phai khmat sha ka ïing.
Kumta u bah Nathaniel um kwah ban pynpaw eiei ha kaba iadei bad ka jingiakhun shi iing shisem, hynrei u ong, ba kiwei ki kyrtong kidon la kajong ka thong bad nga pat nga don la kajong kathong ban shakri ia u paidbah.
Ha sohiong ki dangbun ki jingduna bad ki jingeh haba nga iaid kylleng kylleng, hynrei ynda nga la ioh shong ha ka shuki ha District Council ngin sa peit ia kita baroh, la ong u bah Nathaniel.
Shuh shuh u la ong, ba lada un poi sha kathong ha kane ka ilekshon ba mynta, ki mad ba kongsan bad ba hakhmat eh kalong, ban peit ia ki jingeh u paidbah ka thain, ki pud ki sam ki ba dangdon kam ban pynbeit bad kiwei kiwei de.
Phi don ban ong eiei?